Мамлакатимизда аҳоли саломатлигини муҳофаза қилиш, тиббий хизмат сифатини ошириш борасида кенг кўламли ислоҳотлар амалга оширилмоқда.
Бунинг натижасида ўртача умр кўриш давомийлиги 1995 йилдаги 69,1 ёшдан 2017 йилда 73,7 ёшга етди. 2025 йилга келиб эса бу кўрсаткични 74,8 ёшга етказиш режалаштирилган.
Президентимизнинг “Ўзбекистон — 2030” стратегиясини амалга оширишга оид Фармонига мувофиқ, жорий йилда оналар ўлими кўрсаткичи 12,5, гўдаклар ўлимини 7,5 ва беш ёшгача болалар орасидаги ўлимни 10 промиллегача камайтирилиши белгиланган.
Шу билан бирга, онкологик, юрак-қон томир ва диабет каби эрта ўлим улуши юқори бўлган касалликлар бўйича эрта ўлим кўрсаткичларини пасайтириш вазифалари қўйилган. Таҳлиллар эса белгиланган мақсадларга эришиш учун қўшимча чора-тадбирлар зарурлигини кўрсатмоқда.
Олий Мажлис Қонунчилик палатасининг мажлисида юқоридагилардан келиб чиқиб, Соғлиқни сақлаш вазири А. Худаяровнинг “Соғлиқни сақлаш соҳаси бўйича қабул қилинган ривожлантириш дастурларида белгиланган вазифаларнинг ижроси тўғрисида”ги ахборотини эшитиш бўйича қарор қабул қилинди.
Муҳтарама Комилова, ЎзА