Венгрия Бош вазири Виктор Орбан АҚШ Президенти Трамп билан музокарадан сўнг Будапешт Россия энергия импортига нисбатан жорий этилган АҚШ санкциясидан озод қилинганини айтди.
- Биз энергия тўлови камайишини ҳимоя қилишга муваффақ бўлдик, Венгрия Европадаги энг паст энергия нархини сақлаб қолади, - деди Бош вазир. - Биз Туркия ва “Дружба” нефть қувури орқали етказиб беришни ўз ичига олган санкциядан тўлиқ озод қилиндик.
У АҚШ ва Венгрия ўртасида стратегик келишмовчилик йўқлиги, икки томоннинг манфаати бир-бирига мос келишини таъкидлади. Европа раҳбари сўзларига кўра, Трамп билан учрашувда Россия ва Украина ўртасидаги можарони тинч йўл билан ҳал қилиш мавзуси ҳам муҳокама қилинган.
Орбан қўшимча қилишича, Будапештда Трамп ва Путин учрашуви ўтказилиши масаласи кун тартибида қолмоқда. Фақат тадбир санаси аниқ эмас.
Шунингдек, АҚШ Давлат департаменти ҳам Вашингтон ва Будапешт бир неча муҳим келишувга эришганини эълон қилди. Маълумотга кўра, энди бу икки давлат муносабати янгича стратегик шериклик даражасига кўтарилади.
Ядровий энергия бўйича ўзаро англашув меморандуми имзоланиши асосий натижа сифатида эътироф этилди. Мазкур битим фуқаро ядро саноати, жумладан кичик модулли реакторлар яратишда ҳамкорлик қилиш учун йўл очади.
Венгрия умумий қиймати 20 миллиард долларга етадиган 10 тача кичик модулли реакторлар қурилишини қўллаб-қувватлашга тайёрлигини билдирган. Шунингдек, Американинг “Westinghouse” компанияси билан "Пакш I" атом электр станцияси учун ёнилғи етказиб бериш бўйича 114 миллион долларлик шартнома имзоланди.
Энергетика соҳасида суюлтирилган табиий газ етказиб бериш бўйича ҳамкорлик ҳам музокара кун тартибидан жой олди. Венгрия 600 миллион долларлик Америка суюлтирилган табиий газини харид қилишга ваъда берди.
- Бу келишув Венгриянинг энергия мустақиллигини мустаҳкамлайди, таъминот манбаларини диверсификация қилади, дейилган баёнотда.
Мудофаа соҳасида томонлар Ҳарбий ахборот хавфсизлиги тўғрисидаги битим (GSOMIA)ни янгилаш ва 700 миллион долларлик Америка мудофаа маҳсулотини сотиб олиш бўйича музокара бошлашга келишиб олдилар.
С.Раҳимов, ЎзА