1 октябрь – Ўқитувчи ва мураббийлар куни
Бухоро шаҳридаги 35-умумий ўрта таълим мактабининг инглиз тили фани ўқитувчиси Шахноза Маъдиева “Ўқитиш – икки карра кўпроқ ўқишни талаб этади” қоидасини ўз фаолиятида дастуриламал қилиб олган.
18 йиллик педагогик тажрибага эга бўлган муаллима ўз устида тинимсиз ишлаши, изланиши туфайли қатор натижаларни қўлга киритди. Айниқса, кейинги 2 йилда эришган натижалари анча салмоқли.
Айни пайтда у олий малака тоифасига эга бўлиш билан бир қаторда Халқаро TESOL, ELPC нинг C1даражаси сертификатига эга. Америка элчихонаси ALUMNI Инглиз тили проекти TOEFL курсини, " Summer 2020" онлайн маҳорат курсларини муваффақиятли якунлади.
Халқаро Coursera онлайн платформасининг 17 та курсини юқори натижалар билан тугатиб, халқ таълими вазирлиги томонидан қимматбаҳо совғалар ҳамда диплом билан тақдирланди. Шунингдек, JICA ташкилоти (Япония ) билан ҳамкорликда ташкил этилган малака ошириш курсларини муваффақиятли якунлади. Халқаро миқёсдаги диплом ва совғаларни қўлга киритди.
Ҳозирда эса OPEN дастури бўйича АҚШнинг Oregon Университетида онлайн малака оширмоқда. Шунинг билан бир қаторда Британия Кенгаши онлайн вебинарларининг ҳам фаол иштирокчиси.
Мунтазам изланишлари натижасида маҳорати сайқалланиб бораётганлиги ўқувчиларининг ютуқларида ўз аксини топмоқда. 2015 йилдан буён иқтидорли ўқувчилари фан олимпиадаларининг вилоят босқичида салмоқли натижаларни қўлга киритиб келаяпти. Улардан 4 нафари 2020 йилда халқаро Coursera online курсларини тугатиб, халқаро даражадаги сертификатларга эга бўлди. 20 нафардан ортиқ ELPC ташкилоти уюштириб борадиган халқаро олимпиада ва танловларда ("HIPPO", "Spelling Bee") муваффақиятли иштирок этди. Айнан шу ташкилот томонидан ўтказилган билим даражасини белгилаш тестида муаллиманинг 9-10-синфларда таҳсил олаётган 3 нафар ўқувчиси Б1 даражасини, 3-4 синфда таҳсил олаётган 7 нафар ўқувчиси А1, 1 нафар ўқувчиси А2 даражаларига эга бўлди.
Шаҳноза Маъдиеванинг кучли билим ва ўзига хос маҳорат уйғунлигидаги илғор иш тажрибаси 2020 йилда республика миқёсида оммалаштирилди.
Зариф Комилов, ЎзА