Меҳнат бозорида рақобатбардош муҳандис кадрлар етиштиришда дуал таълим тизимининг алоҳида ўрни бор.

 

Президентимиз Шавкат Мирзиёев раислигида 2024 йилнинг 20 июнь куни муҳандислик соҳаларида кадрлар тайёрлаш ва олий таълим муассасалари фаолиятини янада такомиллаштириш масалалари юзасидан видеоселектор йиғилишида ҳам дуал таълим тизимига ўтиш тўғрисида алоҳида сўз юритилган эди. Юртбошимиз йиғилишда “Тармоқ – корхона – олийгоҳ” занжири асосида ҳар бир олийгоҳга саноат ҳамкори белгилаб берилиши, барча муҳандислик олийгоҳлари ҳамкор корхоналарида кафедралар очиши, дуал таълимни йўлга қўйишини таъкидлаган эди. Бунда корхоналар кафедраларни жиҳозлаш, ўқитувчи ва талабаларни рағбатлантиришга маблағ ажратади. Талабаларнинг амалиёти ва битирув курсдаги таълими тўлиқ ҳамкор корхоналарда ташкил қилинади.

“Навоий кон-металлургия комбинати” АЖда кадрларни тайёрлаш бўйича катта тажриба мавжуд. Корхонада олий таълим муассасалари билан ҳамкорлик тизимли йўлга қўйилган. Навоий давлат кончилик ва технологиялар университети эса комбинат корхоналари учун соҳа мутахассисларини тайёрлашда етакчи олий ўқув юрти ҳисобланади.

Жорий ўқув йилидан бошлаб комбинат ва университет ўртасида йўлга қўйилган “Касб эгаси” дуал таълим тизими асосида 4-босқич талабалари амалиёти корхона бўлинмаларида олиб борилмоқда. Бугунги кунда 150 нафар университет талабаси дуал таълим асосида онлайн ўқиб, Марказий кон бошқармаси бўлинмаларида фаолият олиб бормоқда. Талабалар назарий билимларни амалиётда янада мустаҳкамлаб, бевосита иш жойида касбга доир кўникмаларга ҳам эга бўлмоқда.

Жорий йилда дуал таълим асосида Зарафшон таъмирлаш-механика заводига Навоий давлат кончилик ва технологиялар университети талабаларининг 14 нафари суҳбат асосида ишга қабул қилинди. Уларга малакали мутахассислар устоз сифатида бириктирилган. 

– Жорий йилнинг февраль ойида университетимизда комбинат ҳамкорлигида дуал таълим асосида ишга қабул қилиш бўйича учрашув бўлиб ўтди, – дейди Машинасозлик технологияси йўналиши 4-босқич талабаси Жаҳонгир Облақулов. – Ана шу учрашувда мен суҳбат орқали Зарафшон таъмирлаш-механика заводига ишга қабул қилиндим. Ҳозирда дуал таълим тизими асосида онлайн ўқиб, заводда токарь вазифасида ҳам ишлаяпман. Шу билан бирга заводнинг малакали мутахассисларидан касб сир-асрорларини ўрганмоқдаман.

Бугунги кунда ишга қабул қилинган талабаларнинг иш жойига қатнаши учун корхона томонидан транспорт ажратилган, тушлик ташкиллаштирилган ва белгиланган миқдорда ойлик иш ҳақи ҳам тўланмоқда. 

Хуллас, дуал таълим тизими талабалар ўзларининг назарий билимларини ишлаб чиқариш корхоналарида мустаҳкамлаб, амалий кўникмалар ҳосил қилишида муҳим аҳамият касб этади. Бу ёндашув нафақат ёш авлоднинг профессионал малакаларини ошириш, балки уларнинг меҳнат бозоридаги рақобатбардошлигини ҳам таъминлайди. 

Асосийси меҳнат шароитига мослашган талабалар ўқишни битиргандан сўнг шу корхоналарга ишга қабул қилинади. 

А.Бўриев, ЎзА мухбири