Самарқанд шаҳрида ўтказилаётган "Инсон манфаатларини иқтисодий ислоҳотларнинг бош мазмунига айлантириш" мавзусидаги II Ўзбекистон иқтисодий форумида “Олмалиқ КМК” АЖ ҳамда қатор компания ва банклар ўртасида шартномалар имзоланди.
Жумладан, Германиянинг Helaba банки ўртасида ҳамкорлик шартномаси имзоланди. Мазкур ҳужжат “Олмалиқ КМК” АЖ ва Metso Outotec компанияси ўртасида Рух заводида 6-сонли олтингугурт кислотаси цехини қуриш бўйича муҳандислик хизматларини тақдим этиш ва ускуналар етказиб бериш бўйича тузилган шартномаларни Германиянинг “Еulеr Неrmеs” экспорт суғурта агентлиги остида молиялаштиришни таъминлаш мақсадида тузилди. Имзоланган битимнинг миқдори 67,3 миллион еврони ташкил этиб, 13 йилга 3 йиллик имтиёзли давр билан берилади.
Шунингдек, форумда ОКМК ва Германиянинг BASF концерни ўртасида ҳам ҳамкорлик шартномаси имзоланди. Мазкур ҳужжат замонавий талабларга жавоб берадиган Германиянинг BASF концерни томонидан ишлаб чиқарилган умумий миқдори 998 042,40 евролик “04-111 Сс11х4 ва 04-110 Сс11х4” маркали ванадий катализаторлари харидини амалга ошириш мақсадида имзоланди.
Бундан ташқари, форумда Финляндиянинг Metso Оutotec компанияси ўртасида ҳамкорлик меморандуми ҳам имзоланди. Ушбу меморандум ОКМК негизида янги металлургия мажмуасини қуриш учун асосий муҳандислик ишларини амалга оширишга қаратилган.
ОКМК, AGMK – “Deutsche Innovatsion” қўшма корхонаси ва Германиянинг “Menzel” компанияси ўртасида имзоланган меморандум Чирчиқ шаҳрида ўрта ва юқори кучланишли электродвигателлар ва электрогенераторларни ишлаб чиқариш лойиҳасини амалга оширишга хизмат қилади.
Форумда “Ёшлик-1” конига ускуналар етказиб бериш бўйича Германиянинг TAKRAF компанияси билан ҳам меморандум имзоланди. Форум доирасида ОКМК раҳбарияти ҳамда Trafigure PTE Ltd, Glencore International AG компаниялари, Hitachi компанияси техника воситаларини етказиб берувчи Eurasian Machinery диллерлик ташкилоти вакиллари билан ҳамкорлик музокаралари ўтказилди. Шунингдек, Helaba, KfW, Coommerzbank, Barclays, Natixis, JP Morgan Chase каби банкларнинг раҳбар ва вакиллари билан ҳамкорлик учрашувлари ўтказилди.
Бир сўз билан айтганда, мазкур иккинчи халқаро иқтисодий форум ОКМК учун ҳар томонлама фойдали бўлди.
ОКМК Ахборот хизмати