Бугун, 18 август куни АҚШнинг Сент-Луис шаҳрида шахмат бўйича мукофот жамғармаси 350 минг АҚШ долларидан иборат “Sinquefield Cup-2025” халқаро турнири бошланди.

“Grand Chess Tour”нинг якуний классик босқичи саналган мазкур турнирда маҳоратли шахматчимиз Нодирбек Абдусатторов Левон Аронян (АҚШ), Гукеш Доммаражу (Ҳиндистон), Фабиано Каруана (АҚШ), Рамешбабу Праггнанадха (Ҳиндистон), Алиреза Фирузжа (Франция), Уэсли Со (АҚШ), Ян-Кшиштоф Дуда (Польша), Максим Вашье-Лаграв (Франция), Сэм Севиан (АҚШ) билан куч синашади.

9 та турдан иборат халқаро турнирнинг илк турида ҳамюртимиз Нодирбек Абдусатторов Левон Аронянга қарши дона суради.

Айтиш лозимки, Аронян ўтган ҳафтанинг сўнгги кунларида якунланган “Saint Louis Rapid and Blitz 2025” турнири ғолиби саналади. Ушбу турнирда Нодирбек ҳар икки йўналишдаги ўйинларда  Аронянни мағлубиятга учратган эди.    

“Sinquefield Cup-2025” турнири 29 августга қадар давом этади.

Т.Рўзиев, ЎзА