АҚШ ва Исроилнинг Эронга қарши уруши туфайли нефть нархи кескин ошди. Бу эса Россия бюджетига қўшимча даромад келтирмоқда, деб хабар берди DW нашри.

The Financial Times газетасига кўра, дунёда нефть нархининг ошиши туфайли Россия бюджети ҳар куни, тахминан 150 млн доллар қўшимча даромад олмоқда. Таҳлилчиларнинг баҳолашича, март ойининг охиригача Россия умумий 5 млрд долларгача қўшимча даромад кўради.  

Таҳлилчи Сумит Ритолий Россияни “Яқин Шарқдаги урушнинг асосий ғолиби” деб атаган. Россия президентининг махсус вакили Кирилл Дмитриев The Financial Times нашридаги мақолага фикр билдирар экан, негадир бу вазиятни тарихдаги энг йирик энергетика инқирозининг бошланиши, деб айтган.

Мақола чоп этилганидан сўнг АҚШ Россия нефтига қўйилган санкцияларни вақтинча юмшатган, яъни нефть ва нефть маҳсулотлари 12 -мартга қадар танкерларга юкланган бўлса, уларни етказишга рухсат берилди.

Таҳлилий марказ маълумотларига кўра, 6 мартга қадар танкерларда тахминан 130 млн баррель Россия нефти бор эди ва санкциялар сабабли унинг катта қисми йўлда қолиб кетган эди. АҚШ санкцияларни юмшатиши натижасида тахминан 100 млн баррель нефтни сотиш имкони пайдо бўлди.

АҚШ Россия нефтини сотишга рухсат берганига қарамай, энергетика бозорида вазият ҳали ҳам кескинлигича қолмоқда. Эронга қарши уруш бошланганидан кейин нархлар 40%дан ортиқ ошди.

Нефть бозоридаги кескинликни юмшатиш учун АҚШ Энергетика вазирлиги 11- мартда стратегик захирадан 172 млн баррель нефть чиқаришини эълон қилди. Халқаро энергетика агентлигига аъзо 32 давлат биргаликда жами 400 млн баррель бозорга қўшди.

Бироқ таҳлилчилар бу чораларни самарали деб ҳисобламайди. Уларнинг фикрига кўра бу қисқа муддатли ечимлар муаммони ҳал қилмайди.  

Аниқроғи, Ҳормуз бўғозидаги вазият яхшиланмас экан, нафақат ёқилғи нархларининг ошишига, балки бошқа соҳаларга ҳам жиддий таъсирини кўрсатади.

<iframe width="650" height="420" src="https://www.youtube.com/embed/zVni3F5sttM" title="Neft narxining oshishi Rossiyaga har kuni 150 mln dollar foyda keltirmoqda" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Искандар Исматов, ЎзА