Хўжанд шаҳрида ўтказилган Ўзбекистон, Қирғизистон ва Тожикистон раҳбарлари уч томонлама саммити доирасида “Наврўз – минтақадаги энг қадимий маданий-сайёҳлик мероси” мавзусида минтақавий сайёҳлик форум-мулоқоти ташкил этилди.

Форумда уч мамлакат туризм соҳаси етакчилари, юзга яқин сайёҳлик компаниялари вакиллари қатнашди. 

Тадбирнинг асосий мақсади сайёҳлик соҳасидаги халқаро ҳамкорликни ривожлантириш, Наврўз байрамини умумий тарихнинг бир қисми сифатида оммалаштиришдир. Шунингдек, Наврўзни Марказий Осиёнинг энг муҳим сайёҳлик ва маданий брендларидан бири сифатида тарғиб қилиш орқали минтақада жозибадор ва ўзига хос сайёҳлик маҳсулотларини яратиш учун асос яратиш кўзда тутилган. 

Ўзбекистон минтақамизнинг ягона сайёҳлик ҳудудини янада ривожлантириш учун фаол ҳаракат қилмоқда. Бу доирада сайёҳлар минтақанинг бир нечта мамлакатларига осонлик билан ташриф буюриб, умумий тарих ва маданиятлар хилма-хиллиги билан танишиши мумкин. 

Форумда Ўзбекистоннинг минтақа сайёҳлик жозибадорлигини ошириш ва сайёҳлар оқимини кўпайтиришга қаратилган ташаббуслари ҳам алоҳида муҳокама қилинди. 

Жумладан, Ўзбекистон, Қирғизистон ва Тожикистоннинг ноёб табиий қўриқхона, тоғ тизими ва кўллари, шунингдек, қадимий шаҳарлари ва бошқа диққатга сазовор жойларига ташриф буюришни ўз ичига олган “Фарғона водийсининг олтин сайёҳлик ҳалқаси”ни яратиш масаласи кўриб чиқилди. 

Шунингдек, мамлакатларимизда ўтказиладиган байрам тадбирларини бирлаштирувчи “Наврўз – Марказий Осиё қалбида” деб номланган қўшма маданий-сайёҳлик йўналишини ташкил этиш масаласи кўриб чиқилди. 

Бундай йўналишлар бирлик рамзи ва халқаро туризм бозори учун ноёб маҳсулотга айланиб, маданий меросни тарғиб қилиш ҳамда туризм соҳасидаги кичик ва ўрта бизнесни ривожлантиришга хизмат қилади. 

Қайд этиш керак, Наврўз умумжаҳон маданий бойлик сифатида эътироф этилган, 2009 йил ЮНЕСКОнинг Инсоният номоддий маданий мероси рўйхатига киритилган. 

Форум доирасида иштирокчи давлатлар сайёҳлик компаниялари маршрутлари ва маҳсулотлари тақдимоти ҳамда B2B учрашувлари ўтказилди. Ҳамкорликни янада чуқурлаштириш ва сайёҳларни жалб этишга қаратилган битимлар имзоланди. 

Б.ХУДОЙБЕРДИЕВ, ЎзА