Навоий темир йўл вокзалида Хитой Халқ Республикасининг “CRRC Zhuzhou Locomotive Co., Ltd” компаниясида ишлаб чиқарилган O’Z12T икки секцияли юк поездларини тортишга мўлжалланган замонавий тепловознинг тақдимот маросими бўлиб ўтди.

Тадбир аввалида сўзга чиққанлар “Ўзбекистон темир йўллари” АЖ томонидан йирик лойиҳа ва бунёдкорлик ишлари амалга оширилиб, ягона темир йўл тармоғи яратилганлигини таъкидлади. Шунингдек, темир йўл транспорти мамлакат иқтисодиётида етакчи ўринни эгаллаб, унинг кўп қирралилиги яъни, йилнинг исталган вақтида аҳоли ва иқтисодиёт тармоқларига хизмат кўрсатиш ҳамда халқ хўжалиги эҳтиёжларини таъминлаш, узоқ масофаларга катта ҳажмдаги юк ташиш самарадорлиги ва таннархнинг арзонлиги алоҳида қайд этилди.  

[gallery-24390]

– Давлатимиз раҳбари ташаббуси билан темир йўлларда трансформация жараёнлари олиб борилмоқда, – дейди “Темир йўл инфратузилма” АЖ бошқарув раисининг биринчи ўринбосари Авазбек Аҳмедов. – Бу жараёнда янги локомотивлар сотиб олиш, инфратузилмани янгилаш бўйича бир қатор топшириқлар берилган. Ушбу топшириқларни таъминлаш мақсадида Хитой Халқ Республикасидан икки секцияли локомотив олиб келинди. “Ўзбекистон темир йўллари” акциядорлик жамияти локомотив паркини янгилаш лойиҳаси доирасида бўлиб тўлаш шарти билан харид қилинган ушбу O’Z12T икки секцияли тепловознинг қуввати 7200 кВт бўлиб, 7 минг тонналик юк поездларини тортиш имконини беради.  

Замонавий тепловознинг юқори тезлиги соатига 120 километрдан иборат бўлиб, 16 цилиндрли ички ёнув двигатели билан жиҳозланган. Ёқилғи сарфи 200 (г/КвТ*соат)гача. Тепловозда жуда мустаҳкам автоматик, пневматик ва электрли тормоз тизими ўрнатилган.  

– Қизилқум диёри турли маъданларга бой. Бу маъданларни қазиб, қайта ишлаш корхоналарига етказиб бериш мураккаб жараён, – дейди “НКМК” АЖ бошқарув раиси – Бош директори Қувондиқ Саноқулов. – Бугунги кунда конлардан қайта ишлаш корхоналарига етказиб берилаётган маъданлар ҳажмининг 60 фоиздан кўпроғи темир йўл транспорти орқали ташилмоқда. Бугун Навоийга келтирилган ушбу икки секцияли тепловоз корхона юкларини ташиш учун фойдаланилади.  

Маълумотларга кўра, яқин кунларда юртимизга яна 3 та тепловоз олиб келинади. Йил якунига қадар эса қўшимча 4 та тепловоз ва 2 та электровоз, шунингдек, 2 та модернизация қилинган “O‘zbekiston” русумли электровоз келтирилади.

– “Ўзбекистон темир йўллари” акциядорлик жамият ва Хитой Халқ Республикасининг “CRRC Zhuzhou Locomotive Co., Ltd” компанияси билан дастлабки ҳамкорлик 2003 йилда 12 та “O‘zbekiston” русумли электровоз харид қилинганда бошланган эди, – дейди Ўзбекистондаги Лойиҳа бош директори Ли Зе Хин. – Ишончли ҳамкорликнинг давоми эса 2015 йилда 15 та O‘Z-Y русумли йўловчи электровозларини хариди бўлди. Хитойдан келтирилган электровозлар Ўзбекистон темир йўлларида самарали хизмат кўрсатиб, юртингиз равнақига муносиб ҳисса қўшиб келаётганидан хурсандмиз. Лойиҳа доирасида компаниямиз томонидан 2033 йилга қадар умумий 38 та янги локомотивлар етказиб бериш ҳамда 12 та электровозни модернизация қилиш кўзда тутилган.  

Тадбирдан сўнг Навоий шаҳридаги “Тинчлик локомотив депоси”га пресс-тур уюштирилиб, ишчи-ходимларга яратилган шароитлар, локомотивларни таъмирлаш ва уларга техник хизмат кўрсатиш жараёнлари билан танишилди.

А.Бўриев, С.Аслонов (сурат), ЎзА мухбирлари