Жиззах вилоятининг Мирзачўл туманида плёнка остига чигит экиш бўйича кўргазмали семинар ташкил этилди.

Семинарда плёнка остига чигит экишнинг агротехник талаблари ва меъёрлари, техникалар созлиги, чигитни бир текис ундириб олиш билан боғлиқ ҳолатлар юзасидан тушунчалар берилди.

Кўргазмали амалий семинарда сўзга чиққан Жиззах вилоят ҳокими вазифасини бажарувчи Улуғбек Мустафоев, вилоят ҳокимининг қишлоқ ва сув хўжалиги масалалари бўйича ўринбосари Зафар Рўзиев,  Агросаноат мажмуи устидан назорат қилиш инспекцияси Жиззах вилоят бошқармаси  бошлиғи Акмал Абдуллаев ва бошқалар экиш агротехнологияси ҳақида ўз тавсия ва таклифларини билдирди.

Жорий йилда ўтган йилгидан салмоқлироқ, яъни 11 минг гектар майдонда серҳосил навларни экиб, юксак хирмон барпо этиш мақсад қилинганлиги таъкидланди.  

Бунинг учун эса туманда чигит экишда қатнашиши режалаштирилган  225 дона чопиқ трактори, 225 дона культиватор, 62 та чигит экиш сеялкаси, шундан 12   таси 76х10 схемадаги қўшқатор ва  50 та 76х10 схемалик сеялка, 1372 дона тишли борона, 67 дона ер текислагич ва 50 дона чизел  чигит экишга тўлиқ тайёр ҳолатга келтирилгани қайд этилди.  

– Жорий йил Мирзачўл туманида ялпи майдоннинг 11 минг гектарига чигит экишни режалаштирганмиз ва шундан жами 5610 гектар майдонга Хитой технологияси асосида чигит экиш кўзда тутилган, – дейди “Ўзагроинспекция” Мирзачўл туман бўлими бошлиғи Ф.Раҳмонов. – Ўтган йилги тажрибадан келиб чиқиб, жорий йилда ҳам Хитой технологияси асосида туманимизда “Xin Lu Zao-57” навли уруғлик чигитни  плёнка остига экиш назарда тутилган бўлиб, бу навнинг ўзига хос устуворлиги бор. Ҳар гектар ердан 65 центнердан ҳосил олишни режалаштираяпмиз.

[gallery-22312]

Семинарда пахтачилик соҳасига илмий, инновацион ғояларни кенг татбиқ этиш бўйича фермер хўжаликларига амалий кўрсатмалар берилиб, плёнка остига чигит экиш амалиёти  намойиш этилди.

А.Қаюмов, Ж.Ёрбеков (сурат), ЎзА мухбирлари