Мамлакатимизда кинология соҳасини янада ривожлантириш ва мутахассис-кинологлар ўртасида соғлом рақобат муҳитини шакллантириш мақсадида бир қанча тизимли ишлар амалга оширилмоқда.

Шу ўринда Миллий гвардия Фарғона вилояти бўйича бошқармаси ҳудудида Миллий гвардия бўлинмаларининг мутахассис-кинологлари ўртасида "Энг яхши кинолог" мусобақасининг республика босқичи бўлиб ўтди.

Уч кун давом этган мусобақада 49 нафар эркак ва аёл ҳарбий хизматчи мутахассис-кинологлар ўзларига бириктирилган хизмат итлари билан биргаликда 3200м масофага якка тартибда югуриб ўқ отиш, 300 метрли масофага тўсиқларни хизмат ити билан енгиб ўтиш ва 1600 метрли масофага жамоа таркибида югуриш машқлари бўйича ўзаро беллашди.

Қайд этиш керакки, мусобақада иштирок этаётган мутахассис-кинологлар орасидан энг кучлилари саралаб олиниб, терма жамоа шакллантирилади.

Мусобақанинг якуний натижаларига кўра, 1-ўринга Миллий гвардия Фарғона вилояти бўйича бошқармаси мутахассис-кинологи сазовор бўлди. 2-ўринни Миллий гвардия Жиззах вилояти бўйича бошқармаси мутахассис-кинологи эгаллаган бўлса, 3-ўрин Миллий гвардия Сурхондарё вилояти бўйича бошқармаси мутахассис-кинологига насиб этди.

<iframe width="640" height="420" src="https://www.youtube.com/embed/MwqxTeJZjdc" title="Milliy gvardiya: Eng yaxshi kinologlar aniqlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мусобақа якунида ғолиб бўлган мутахассис-кинологлар кубок, медаль, дипломлар ва Миллий гвардия Фарғона вилояти бўйича бошқармасининг эсдалик совғалари билан муносиб тақдирландилар.

Н.Раҳмонова, ЎзА