ФОТОРЕПОРТАЖ

Ўзбекистон ва Тожикистон ўртасидаги дўстона муносабатлар изчил ривожланиб, стратегик шериклик даражасига кўтарилмоқда. Икки халқни азалий қўшничилик ва дўстлик ришталари боғлаб туради. Ушбу муносабатларни янада мустаҳкамлаш мақсадида чегараолди ҳудудларда ва кўп миллатли маҳаллаларда маданий-маърифий тадбирлар ўтказилмоқда. Хусусан, Сурхондарё вилоятининг Узун туманида тожик миллатига мансуб аҳолиси кўпчиликни ташкил этувчи Меҳнат маҳалласида Наврўз байрами катта тантана билан нишонланди.  

[gallery-22596]

Кўп миллатли Узун тумани қўшни Тожикистон Республикаси билан чегарадош ҳудуд ҳисобланиб, туманда 180 минг нафардан ортиқ аҳоли истиқомат қилади. Ҳудудда ўзбеклар билан бирга тожик, туркман, татар, рус, қирғиз каби ўнлаб миллат вакиллари тинч ва тотув умргузаронлик қилиб келмоқда.  

Тадбир давомида Меҳнат маҳалласида яшовчи турли миллат вакиллари ва миллий марказларининг фольклор жамоалари ўзларининг миллий рақс ва қўшиқларини ижро этди. Улар томонидан ташкил этилган миллий таомлар кўргазмаси намойиши эса тадбирда иштирокчиларда катта таассурот қолдирди. 

Бу каби тадбирлар икки халқнинг азалий анъаналари ва урф-одатларини асраб-авайлаш, уни ёш авлодга етказиш йўлида муҳим аҳамият касб этади.  

Жонибек ҚЎЗИМУРОДОВ(сурат),ЎзА