Мамлакатимиз пойтахти Тошкент шаҳрида Парламентлараро иттифоқнинг 150 - юбилей ассамблеяси ўз ишини давом эттирмоқда.

ЎзА мухбири Ассамблеяда иштирок этаётган Парламентлараро Иттифоқ Бош котиби Мартин Чунгонг билан суҳбатлашди:  

– Биз бугун “Юбилей ассамблея”га йиғилдик. Парламентлараро Иттифоқнинг 150-ассамблеяси илк бор ушбу минтақада — Ўзбекистонда ўтказилмоқда.  

Шу муносабат билан мамлакат раҳбарияти, шахсан Президент Шавкат Мирзиёевга ва Сенат Раиси Танзила Норбоевага чуқур миннатдорлигимни билдираман. Уларнинг раҳбарлигида ушбу муҳим ассамблеяни юқори даражада ўтказиш учун зарур барча шароитлар яратилган.  

Мазкур йиғилиш гендер тенглиги борасида муҳим йилга тўғри келмоқда ва, мен хурсандманки, Сенат Раиси бу борада етакчилик қилиб, гендер тенглигини тарғиб қилишда фаол иштирок этмоқда.  

Имкониятдан фойдаланиб, Ўзбекистон расмийларини ёшларнинг сиёсий ҳаётдаги иштирокини ошириш борасида эришган ютуқлари билан табрикламоқчиман. Мен бу ерга илк келганимда, ёшларнинг иштироки жуда паст эди, аммо ҳозирда бу кўрсаткич сезиларли даражада ошган. Бу борада Ўзбекистон Президентининг сиёсий жараёнларда инклюзивликни таъминлашга қаратилган чоралари эътиборга лойиқдир.

Тошкентга қарийб 2000 нафар меҳмон келди. Тошкент – парламент дипломатиясининг пойтахтига айланди. Бу йиғилиш глобал ҳамжамият дуч келаётган муаммолар, зиддиятлар ва низоларни мулоқот орқали ҳал қилиш мумкинлигини кўрсатувчи намунага айланади. Айни вақтда дунё мураккаб муаммолар, урушлар ва зиддиятлар гирдобида қолаётган бир пайтда, ушбу ассамблеянинг Ўзбекистонда ўтказилиши мамлакат раҳбариятининг кўп томонлама ҳамкорлик ва парламент дипломатиясини ривожлантиришга бўлган содиқлигини кўрсатади.  

Бунинг учун Парламентлараро Иттифоқ жуда миннатдор.

Умид қиламизки, биз “Тошкент декларацияси” деб номланувчи асосий баёнотни қабул қиламиз. Ушбу декларация Парламентлараро Иттифоқ учун “йўл харитаси”бўлиб хизмат қилади ва ижтимоий тараққиёт ҳамда ижтимоий адолатни тарғиб қилишда бажариладиган ишлар учун асос бўлади.

Ассамблеяга катта умид боғлаганмиз. Ишончим комилки, биз Ўзбекистон расмийларининг бу муҳим тадбирни ўтказиш таклифини қабул қилишда асло хато қилганимиз йўқ.  

<iframe width="650" height="420" src="https://www.youtube.com/embed/l8aq60Wsmqk" title="Martin Chungong: Toshkent assambleyasi – global hamjamiyat duch kelayotgan nizolarni muloqot" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Норгул Абдураимова, Дониёр Якубов (видео), Анвархўжа Аҳмедов (монтаж), ЎзА