Мамлакатимиздаги мавжуд қонунчиликка кўра, меҳнатга лаёқатсиз ва ёлғиз кексалар, ногиронлиги бўлган шахслар ҳамда аҳолининг ижтимоий жиҳатдан эҳтиёжманд бошқа тоифаларининг ҳуқуқлари давлат ҳимоясидадир.
Ижтимоий ҳимоя миллий агентлиги матбуот хизматининг маълум қилишича, 2025 йил март ойида 26 минг 711 нафар фуқаро учун 32,8 миллиард сўм миқдорида бир марталик нафақа тўловлари тўлаб берилган.
Шундан 14 минг 364 нафар фуқарога 11,6 миллиард сўм фарзанд туғилганда бериладиган бир марталик (суюнчи) нафақаси, 12 минг 347 нафар фуқарога 21,1 миллиард сўм дафн этиш учун нафақаси тўланган.
Маълумот ўрнида таъкидлаш лозимки, давлат аҳолининг ижтимоий жиҳатдан эҳтиёжманд тоифаларининг ҳаёти сифатини оширишга, жамият ва давлат ҳаётида тўлақонли иштирок этиши учун уларга шарт-шароитлар яратишга ҳамда уларнинг асосий ҳаётий эҳтиёжларини мустақил равишда таъминлаш имкониятларини кенгайтиришга қаратилган чораларни кўради. Хусусан, 2025 йил февраль ойида 27 минг 635 нафар фуқаро учун 33,8 миллиард сўм миқдорида бир марталик нафақа тўловлари тўлаб берилган.
Муҳайё Тошқораева, ЎзА