Жорий йилнинг 8-13 сентябрь кунлари Остона шаҳрида V Бутунжаҳон кўчманчилар ўйинлари ўтказилди.
"Остона арена"да бўлиб ўтган тадбирда қатор давлатлар раҳбарлари ва бошқа хорижий меҳмонлар қатнашди.
Германиянинг Ҳессен федерал ўлкаси давлат канцеляриясининг Европа масалалари ва халқаро ҳамкорлик департаменти собиқ раҳбари Михаэль Борхманн Ўзбекистон Президенти Шавкат Мирзиёевнинг V Бутунжаҳон кўчманчилар ўйинларининг тантанали очилиш маросимидаги иштироки ҳақида ўз фикрлари билан ўртоқлашди:
- Ўзбекистон раҳбарининг Остона шаҳрида ташкил этилган V Бутунжаҳон кўчманчилар ўйинларининг тантанали очилиш маросимидаги иштироки яна бир бор Марказий Осиё мамлакатлари бирдамлигини намоён этди.
2021 йилда ЮНЕСКОнинг номоддий маданий мероси рўйхатига киритилган Кўчманчилар ўйинлари минтақа халқларининг бир неча асрлик, инсоният тарихида из қолдирган қадимги анъаналари, миллий ўйинлари ҳамон яшаб келаётганини бутун дунёга танитиш учун яна бир имконият бўлди, десам муболаға бўлмайди.
Камондан ўқ отиш, кураш ва кўпкари каби қадимий ва ажойиб кўчманчи спорт турлари қаторига асрлар оша янгилари қўшилди. Дунёнинг 90 дан ортиқ мамлакатидан 2 мингга яқин спортчилар иштироки ушбу спорт байрамининг кўламини янада кенгайтирди. Ушбу ўйинлар биринчи навбатда Марказий Осиё бой маданиятининг дунё ҳамжамиятидаги ёрқин ифодаси бўлиб қолади.
Ўзбекистон Президентининг ушбу ўзига хос нуфузли спорт тадбирининг очилиш маросимидаги иштироки Ўзбекистон лидерининг Марказий Осиё бирдамлиги ва ҳамжиҳатлигида муҳим ўрин тутувчи инсон эканлигини алоҳида эътироф этишни хоҳлардим.
Н.Зиёдуллаева, ЎзА