Сўз – экспертларга

Ўзбекистонда бугунги кунда Қозоғистон капитали иштирокидаги 37 та ахборот технологияларига ихтисослашган компания фаолият юритмоқда. Худди шундай бизнинг йирик компанияларимиз ҳам Қозоғистон бозорига кириб бормоқда, бу дегани – Марказий Осиё биргаликда учинчи, яъни халқаро бозорга чиқиш имкониятига эга бўлмоқда. Мамлакатларимиз рақамлаштириш соҳасидаги ўзаро манфаатли ҳамкорликни кенгайтирмоқда, жумладан, қўшма IT маҳсулотлари яратилаётгани муҳим аҳамиятга эга.

Куни кеча Ўзбекистон Республикаси Президенти Шавкат Мирзиёевнинг Қозоғистонга амалий ташрифи чоғида икки мамлакат раҳбарлари биргаликда “AlmatyFair.ai” рақамли технологиялар ва сунъий интеллект кўргазмасига ташриф буюрди. Етакчилар Марказий Осиёдаги энг йирик технопарклар бирлашмаси – “Central Asian Innovation Hubs” ("Astana Hub" ва "IT Park Uzbekistan")  фаолияти билан ҳам танишди.

Бу каби қўшма лойиҳалар мамлакатларимиз ёшларини бирлаштиради. Улар йирик стартап лойиҳаларни ишлаб чиқиб, ўз салоҳиятини жаҳон бозорига намойиш қилиш имкониятини қўлга киритиши қувонарли.

Икки мамлакат тегишли вазирликлари раҳбарлари бу борада кўплаб ишлар амалга оширилаётганини таъкидлаб, шундай дейди:

Жаслан МАДИЕВ, Қозоғистон Республикаси рақамли ривожланиш, инновациялар ва аэрокосмик саноат вазири:

– Мамлакатларимиз ўртасида ҳамкорлик қилиш учун улкан салоҳият мавжуд. Бугунги кунда ахборот технологиялари паркларимиз фаол ҳамкорлик қилмоқда, жумладан, халқаро кўргазмаларда биргаликда иштирок этяпмиз. Стартаплар – сунъий интеллект соҳасидаги лойиҳаларни ҳамжиҳатликда нафақат минтақа доирасида, балки митақадан ташқарида ҳам илгари суряпмиз.

Пировард мақсадларимиздан бири – Ўзбекистон билан ҳамкорликда стартапларимизни глобал бозорга олиб чиқиш. Чунки компанияларимизни бирлаштирсак, бизда стартапларни кенг миқёсда, янада сифатли тарзда синовдан ўтказиш ва жаҳон миқёсига олиб чиқиш имконияти пайдо бўлади.

Кўриб турибмизки, Ўзбекистоннинг мазкур йўналишдаги ишлари жадал ривожланмоқда. Рақамлаштиришга, хорижий компанияларни жалб қилишга катта эътибор қаратилмоқда. Мамлакатингиз IT-Парк резидентларининг сони ортиб бормоқда, экспорт тушумлари ҳам ошяпти. Бу, албатта, ажойиб кўрсаткич ҳисобланади.

Шерзод ШЕРМАТОВ, Ўзбекистон Республикаси рақамли технологиялар вазири:

– Ўзбекистон ва Қозоғистон Президентларининг дўстона муносабатлари халқларимиз ўртасидаги ҳамжиҳатликка, компанияларимиз фаолияти ривожланишига хизмат қилмоқда. Масалан, ахборот технологияларига ихтисослашган компанияларимиз ҳамкорлиги тез суръатларда фаоллашиб, биргаликда ишлаш имконияти кенгаймоқда.

Икки мамлакат IT-парклари бирлашиб, янги стартапларни йўлга қўяётгани Марказий Осиёни учинчи давлатга намойиш этиш имкониятини юзага чиқармоқда. Бугунги кунда Ўзбекистон IT-Парк ва Остона-Ҳаб компаниялари биргаликда АҚШ, Европа, Араб ва Осиё давлатларида ўтаётган энг йирик форумларда иштирок этмоқда. Натижада жаҳоннинг машҳур компаниялари минтақамизга қизиқиб, ташриф буюрмоқда, ўз офисларини очмоқда.

Умуман, чет эл компаниялари Ўзбекистонга келадими, Қозоғистонга келадими фарқи йўқ: Марказий Осиё ҳудудига келдими, демак ёшларимиз учун янги иш ўринлари яратилади, улар салоҳиятини кўрсатишга имкон пайдо бўлади.

Таъкидламоқчиманки, икки мамлакат иштирокидаги компаниялар сони ортиб бормоқда. Жумладан, Қозоғистон капиталидаги 37 та компания Ўзбекистонда офисини очди. Шунингдек, бизнинг йирик компанияларимиз ҳам Қозоғистон бозорига кириб бормоқда, бу дегани – биз биргаликда учинчи, яъни халқаро бозорга чиқиш имкониятига эга бўляпмиз.

Давлат раҳбарлари ўртасидаги дўстона муносабат нафақат вазирлик ёки ахборот технологиялари парклари даражасида, балки компаниялар даражасидаги ўзаро ҳамкорлик, ҳамжиҳатликнинг янги қирраларини очиб бермоқда.

Беҳруз ХУДОЙБЕРДИЕВ, ЎзА мухбири