Хитойнинг Жиахинг шаҳрида енгил атлетиканинг марафон йўналиши бўйича ўтказилган XX Осиё чемпионатида 20 дан ошиқ давлатнинг маҳоратли югурувчилари қаторида Ўзбекистон терма жамоаси аъзолари ўз омадларини синовдан ўтказди.

Осиё енгил атлетика ассоциацияси маълумотига кўра, марафонда 20 та давлатнинг 50 нафар энг тажрибали спортчилари, 20 мингдан зиёд хитойлик югурувчилар, 23 та давлат миллий терма жамоаси аъзолари иштирок этди.

Ўзбекистон терма жамоаси аъзоси Андрей Петров Хитой марафонида 2:14:32 натижа қайд этиб, 5-ўринни эгаллади ва шахсий рекордини ўрнатди. У 2018 йили Сеул халқаро марафонида 2:15:17 натижага эришганди. Петровнинг ушбу кўрсаткичи Ўзбекистон тарихида Шоҳруҳ Давлатов(2:07:02) ва Владимир Белобородов (2:13:28)дан кейинги энг яхши вақт сифатида эътироф этилди.

Хитой марафонида қатнашган Нодир Муталипов 2:27:35да масофани босиб ўтиб, йигирманчи ўринни эгаллади, Шоҳруҳ Давлатов эса 26-километр масофада пойгани тарк этди. Шоҳсанам Хуррамова ва Азиза Мирзакбарова 2:51:48 ҳамда 2:54:52 натижа билан 11 ва 12-қаторларда марра чизиғини кесиб ўтди.

Т.Рўзиев, ЎзА