“Долзарб бир ойлик” сафарбарлик доирасида “Ўзкимёсаноат” АЖ томонидан Фарғона вилояти Ёзёвон туманидаги Янгиобод, Иштихон ва Сувли ариқ маҳаллаларида аҳоли билан ишлаш, муаммоларни ўрганиш ва уларни бартараф этиш бўйича тизимли ишлар олиб борилди.

Дастлаб ушбу маҳаллаларда хонадонма-хонадон хатлов ўтказилиб, аҳоли вакиллари билан учрашувлар ташкил этилди. Уларда кам таъминланган оилалар ва меҳнатга лаёқатли фуқароларнинг бандлигини таъминлаш бўйича таклифлар тингланди. Шу асосда жамият томонидан амалий чора-тадбирлар режаси ишлаб чиқилди.

– Лойиҳа доирасида эҳтиёжманд хонадонларга моддий ёрдам кўрсатиш ва уларнинг даромадини ошириш мақсадида 8 та хонадонга мини мотокультиватор, 4 та хонадонга инкубатор, 7 та хонадонга пайвандлаш аппарати, 16 та хонадонга оверлок, 28 та хонадонга тикув машинаси берилди. Бундан ташқари, маҳалла биносининг бўш хонасида кооперация асосида тикувчилик цехи ташкил этилди ва лидер тадбиркорга бириктирилди. Шунингдек, 20 та хонадонга пишириқлар тайёрлаш учун электр печи тақдим этилди. Оғир турмуш шароитида яшаётган 4 нафар талабанинг олий таълим муассасасида ўқиши учун 1 йиллик шартнома тўловлари тўланди, – деди “Ўзкимёсаноат” АЖ ахборот хизмати раҳбари Ҳожиакбар Тўлаганов.

Ўрганиш жараёнида меҳнат миграциясига юбориш учун хорижий тилларга ўқитиш, жарроҳлик амалиёти ва даволаниш учун молиявий ёрдам кўрсатиш ишлари ҳам амалга оширилди. Муҳими, ушбу ташаббуслар натижасида 184 та хонадонга моддий ёрдам кўрсатилиб, 160 та янги иш ўрни яратилди.

Н.Зиёдуллаева, ЎзА