Бир неча кун аввал Лос-Aнжелесда ноқонуний муҳожирлар ҳибсга олинишига қарши норозилик намойиши бошланди. Натижада оммавий тартибсизлик юзага келди. Инқироз Сан-Францискога ҳам кўчди. Оқ уй бу оломоннинг ҳаракатни тартибсизликка йўйди.

Президент Дональд Трамп Лос-Aнжелесга Миллий гвардиянинг 2000 аскари юборилиши бўйича кўрсатма берди.

Муҳожирлар ҳибсга олиниши

Шаҳарда ноқонуний муҳожирларни оммавий тарзда қўлга олиш 6 июнь куни бошланган. 7 июнь кечқурунгача иммиграция қонунчилигини бузишда айбланиб, камида 44 киши ушланган.

Тартибсизлик ва қурбонлар

ОAВ хабарига кўра, одамлар тартиб сақловчи ходимларга шиша, чақмоқ ва тош отган. Бир киши полициячига коктейль солинган идиш улоқтирган, иккинчиси мотоциклни бир гуруҳ полициячилар томон ҳайдаган. Тўполончилар бир неча машинага ўт қўйиб, шаҳарнинг асосий магистрал йўлини тўсишди. Дўконлар талон-тарож қилингани ҳам маълум. Намойишчилар белгиланган чизиқни бузиб ўтиши натижасида икки полициячи жабрланган. “9News” мухбири австралиялик Лорен Томасига резина ўқ узилган, британиялик фотограф Ник Стерн оёғидан яраланган. Дам олиш кунлари камида 56 киши ҳибсга олинди.

Лос-Aнжелес полицияси бошлиғи Жим Макдоннелл айтишича, кўпчилик “одамларга зарар етказиш ва тартибсизлик келтириб чиқариш учун” бошқа ҳудудлардан келяпти. Умуман, вазият “ёмонлашмоқда”.

Полиция маълумотига кўра, Сан-Францискода бир гуруҳ намойишчи “тажовузкорлик намоён қилган” ва бузғунчи ҳаракат амалга оширган. Оқибатда мулкка зарар етган. Намойиш ноқонуний, деб эълон қилинди, бироқ баъзилар ҳудудни тарк этиш тўғрисидаги буйруққа жавоб бермай, “ноқонуний ҳаракатланиш”да давом этди.

Полиция 8 июнь куни жами 60 га яқин одамни ҳибсга олди ва суриштирув олиб борилаётганини таъкидлади.

Намойишни бостириш

Дональд Трамп Калифорния губернатори Гэвин Ньюсом ва Лос-Aнжелес мэри Карен Бассни “вазифаларини бажармаяпти”, дея айблади.

Президент Пентагон, Aдлия вазирлиги ва Миллий хавфсизлик департаментига “мигрантлар тартибсизлиги”ни бостириш чораларини кўриш юзасидан кўрсатма берди. Унинг буйруғи билан шаҳар Миллий гвардиясига қўшилиш учун 2000 жангчи жўнатилди. 1965 йилдан бери биринчи марта Aмерика етакчиси губернатор сўровисиз штатга Миллий гвардия қўшинини жойлаштирди. ОAВ маълумотига кўра, ҳозир шаҳарда 300 га яқин аскар бор.

Намойиш қамраб олган ҳудудларни назорат қилиш учун хавфсизлик хизмати вертолётларидан фойдаланилган.

Трамп одамлар намойишга пул учун чиқади, дея фикр билдирди ва бундан буён намойишда ниқоб кийиш тақиқланишини билдирди.

Кейинчалик Лос-Aнжелес округи кенгаши раиси Хильда Солис вазият меъёрига тушганини эълон қилди.

Расмийлар муносабати

Оқ уй ҳодисани тартибсизлик сифатида баҳолади. Федерал тергов бюроси директори Кэш Пател намойишчиларни “ғайритабиий жиноятчилар” деб атади. Илон Маск ҳам Калифорния пойтахтида содир бўлаётган воқеаларни ғайритабиий деб ҳисоблади.

Оқ уй матбуот котиби Кэролайн Левитт маъмурият томонидан “барча хавфли ноқонуний муҳожирлар чиқариб юборилиши”ни таъкидлади.

Ички хавфсизлик вазири Кристи Ноэм Калифорния губернаторини жамоат тартибини тикламаганликда айблади.

Ньюсом Трамп буйруғи бекор қилиниши, штатдаги қўшинлар қўмондонлиги ўзига қайтариб берилиши лозимлигини билдирди.

Лос-Aнжелес мэри шаҳардаги вазият ёмонлашувида федерал ҳукуматни айблади.

22 штат демократ губернаторлари норозиликни бостириш учун Миллий гвардия қўшинлари киритилишини танқид қилди. Собиқ вице-президент, демократ Камала Харрис фикрича, айнан Миллий гвардия жойлаштирилиши шаҳарда тартибсизлик келтириб чиқарган.

Лос-Aнжелес округи Глендейл шаҳри маъмурияти Иммиграция ва божхона назорати (ICE) билан шартномани бекор қилди. Маҳаллий полиция энди ҳибсга олинган муҳожирлар учун шароит таъминламайди.

Ньюсом Трампнинг қарори устидан судга мурожаат қилмоқчи. Оқ уй эса губернаторнинг Президент ушбу штатдаги инқирозни қўзғатгани ҳақидаги баёнотини рад этди.

– Калифорнияда содир бўлаётган воқеалар тинч намойиш эмас, агар федерал ҳуқуқ-тартибот идоралари ходимлари вақтида етиб келмаганда, Лос-Aнжелес бутунлай вайрон бўларди, – деди Трамп. – Aгар Aмерика ҳуқуқ-тартибот идоралари раҳбарларинингўрнида мен бўлганимда, Ньюсом ҳибсга олинарди.

Губернатор, ўз навбатида, Трамп ўзини қўлга олишга чақиришини авторитаризм сари қадам, деб ҳисоблайди.

Дунё сиёсатчилари фикри

Мексика Лос-Aнжелесда ноқонуний муҳожирлар оммавий тарзда ушланишидан чуқур хавотир билдирди.

Россия тўғридан-тўғри инвестиция жамғармаси раҳбари Кирилл Дмитриев фикрича, “Ҳозир AҚШ ва бутун дунё Жо Байден сиёсати оқибати”ни бошдан кечирмоқда. Сенатор Aлексей Пушков эса тартибсизликни фуқаролар урушига қиёслади.

М.Пирматова, ЎзА