Россиялик миллиардер Роман Абрамович 2022 йилда Англия ҳукумати босими остида «Челси» футбол клубини сотган эди. Сотувдан тушган пулни эса музлатиб қўйишди. Абрамович энди бу маблағдан фақат бир мақсадда, Украинага ёрдам кўрсатиш учун ишлатиши мумкин, деб хабар беради Евроньюс.

Гап шундаки, Буюк Британия Бош вазири Кир Стармер Қуйи палатада сўзлаган нутқида Роман Абрамович томонидан «Челси» футбол клуби сотилишидан олинган 2,8 млрд евро маблағни Украинага йўналтиришга рухсат берилганини маълум қилди.  

Унинг сўзларига кўра, агар тадбиркор мазкур қарорга бўйсунмаса, унга нисбатан суд орқали чора кўрилади.  

Қарорга мувофиқ, ушбу маблағлар Украинага йўналтирилади, бироқ келажакда уларни бутун дунёдаги қуролли можаролар қурбонларига ёрдам бериш учун ҳам ишлатиш мумкин бўлади. Шу билан бирга, пуллар Роман Абрамович ёки санкция остида бўлган бошқа шахсларга даромад келтирмаслиги шарти қўйилган. Буюк Британия Россия –Украина уруши бошланганидан кейин, россиялик олигархларга қарши санкциялар жорий қилди. Шу сабабли, Роман Абрамович ўзининг Англия Премьер-лигасидаги футбол клубини сотишга мажбур бўлган эди.  

Эндиликда сотувдан тушган маблағлар музлатилган ҳолда қолмоқда.  Олигарх томонидан муаммони ҳал қилиш учун музокаралар олиб борилган, лекин самара бермаган.  

Унга Владимир Путин билан яқин алоқалари сабабли санкция жорий этилган эди. Абрамович шундан бери оммавий ахборот воситаларида ҳам кўриниш бермаяпти.

<iframe width="560" height="315" src="https://www.youtube.com/embed/1F1FRSTDiRA?si=kVJXpccSMCYP1eyr" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Искандар Исматов, ЎзА