Тошкент фотосуратлар уйида Ўзбекистон халқ рассоми Икром Баҳромов хотирасига бағишланган рассомнинг рангтасвир асарларидан ташкил топган “Куйлаб ўтдим қўшиғимни мен” кўргазмаси очилди.

Тадбирда қайд этилганидек, унинг полотноларида мўйқалам зарбларининг ритми оламга сингиб кетгандек оҳанг ва туйғуни беради. Картиналар майдони ўта аниқлик билан ташкил этилган: композицион ечимнинг равшанлиги тасвирий тилнинг бойлиги билан уйғунлаштирилиб, ички ёруғлик билан тўлдирилган. Унинг асарларида атроф-муҳитнинг гўзаллигигина эмас, балки ҳаётни фалсафий англаш – тафаккур лирикасидан тортиб, эпик миқёсгача акс эттирилган.

Рассомнинг истеъдоди кенг эътирофга сазовор бўлган. У “Меҳнат шуҳрати” ордени (2001), Ўзбекистон халқ рассоми унвони (2007) билан тақдирланган.

Ижодий фаолияти билан бир қаторда, ўзи ўқиган институтнинг дастгоҳли рангтасвир кафедрасида дарс бериб, ёш рассомларга ўз маҳоратини ўргатди.

Бугунги кунда И.Баҳромовнинг асарлари мамлакатимизнинг йирик музейлари, жумладан, Ўзбекистон давлат санъат музейи, Темурийлар тарихи давлат музейи ва Ғафур Ғулом мемориал уй-музейи, Россия, Европа, АҚШ ва Туркиядаги шахсий коллекцияларда сақланмоқда.

Ушбу кўргазма миллий анъаналар ва умумбашарий бадиий тилни уйғунлаштирган ҳолда ўз даври руҳини ифода эта олган устанинг картиналарини кўриш учун томошабинларга ноёб имконият яратади.

Гулноза Бобоева, ЎзА