1 апрель – Кулги ва ҳазил куни

Бухорода 1 апрель – Кулги ва ҳазил куни муносабати билан “Насриддин Афанди” анъанавий фестивали ўтказилмоқда.

Бухоронинг туризм имкониятини дунё миқёсида кенг намойиш этиш, шунингдек, тарихий қадриятларимиз тарғиботини янада оширишни мақсад қилган мазкур фестивалга нафақат маҳаллий, балки чет эллик меҳмонларнинг ташрифи ҳамда қизиқишлари ортиб бормоқда. Шунга мос равишда фестиваль дастури ранг-баранг лойиҳалар билан бойимоқда. 

[gallery-22609]

Жорий йилги фестиваль Насриддин Афанди бошчилигидаги эски шаҳар кўчалари бўйлаб миллий карвон юриши билан бошланди. Янграган миллий қўшиқлар, миллий қаҳрамонларнинг қиёфаси акс этган катта-кичик қўғирчоқлар аҳоли, фестиваль меҳмонлари, айниқса, хорижий сайёҳларнинг ҳайратини оширди. 

Нодир Девонбеги мадрасаси олдида фестивалнинг рамзий очилиш маросими ўтказилди. Вилоят ҳокимининг ўринбосари Ботиржон Шаҳриёров фестивалнинг аҳамияти, уни ташкил этиш тарихи ҳақида сўз юритиб, йиғилганларни ҳазил-мутойиба куни билан қутлади.

– Мен Ўзбекистоннинг туризм имкониятини ўргангани келганман, – дейди хорижий сайёҳлардан бири. – Халқингиз хушфеъл, кулгисевар, бағрикенг экан. Буни Бухорога келган кунимдаёқ кўриб, ҳис этганман. Бугунги фестиваль ўзбек халқи урф-одатлари, анъаналари ҳақидаги тасаввуримни янада бойитди. Шубҳасиз, бундай фестивал ва сайллар Бухоронинг туристик жозибадорлигини оширишга хизмат қилади. 

Фестиваль доирасида турли гуруҳларнинг чиқишлари, маданий концерт дастурлари ўрин олган. 

Фестиваль доирасида “Шарқ таомлари” танлови ҳам бўлиб ўтади. 

Зариф Комилов, Тоҳиржон Истатов (сурат), ЎзА мухбирлари.