Давлат раҳбарларининг учрашувларидан халққа аниқ, манзилли наф кўзда тутилади. Масалан, Ўзбекистон ва Франция Президентлари сиёсий, иқтисодий, ижтимоий соҳаларда битимлар имзолади. Улардан бири Франция тараққиёт агентлигининг Ўзбекистонга чорвачиликни ривожлантириш учун имтиёзли кредит ажратиши ҳақида эди. Фарғона вилоятидаги чорвадорлар ана шу кредит линияси доирасида паррандачилик, балиқчилик, гўшт ва сут етиштириш чорвачилиги учун самарали фойдаланишяпти.

“Қувасой Рўзибуво янги боғи” фермер хўжалигида 150 гектар ер бор. Унга буғдой, беда, маккажўхори экадилар. Қаров агротехник қоидалар асосида, маҳаллий ўғит керагича. Сабаби фермер хўжалиги чорвачиликка ихтисослашган. Бу ерда 136 бош қорамол боқиляпти. Ҳар бири тоннага етиб тош босади. Наслли. Сути ҳам ёғли. Гўшти сифатли.

Бир ёнда эса паррандачилик цехи бор. Ўн мингта товуқ боқиляпти. Ҳар куни аҳолига 9 мингдан зиёд оқсилга бой тухум юборилади. Ҳа, бугун уларнинг ишлари беш, дейиш мумкин. Лекин кеча... техникадан муаммолари бор эди. Эски тракторлари кунда- кунора бузилар, ёқилғинику етказиб бўлмасди.

Ғолибжон бош бўлган фермер хўжалигида қарийб 40 йил илгари ишлаб чиқарилган “Беларусь” номли 50 от кучига эга бўлган эски трактор бор эди. Яқинда у яна бир 50 от кучига эга, олди ғилдираклари ҳам тортадиган, қўшимча вазифаларни бажара оладиган механизмлари бўлган “Ловол” тракторини имтиёзли кредит асосида олди. Ҳа энди кредитга трактор олган бўлса олгандирда, дейишга шошилманг. Бу кредитнинг ўзига хос шартлари бор. Гап шундаки, агар фермер хўжалигида эски трактор бўлмаганида янги трактор учун кредит ажратилмаган бўларди.

Агар фермер хўжалигида ишлаб чиқарилганига 15 йилдан ошган эски трактор бўлмаганида янгисини сотиб олиш учун кредит берилмас эди. Бу имтиёзли кредитнинг биринчи шарти бўлган.

– Франция тараққиёт агентлиги линиясидан “Микрокредитбанк” орқали 500 миллион сўм кредит олиб, ўзимиз қишлоқ хўжалигида фойдаланишда эскирган 2 та тракторимиз ўрнига янги, ёқилғини кам сарфлайдиган, экологияга кам зарар етказадиган 2 та трактор олдик, – дейди “Қувасой Рўзибуво янги боғи” фермер хўжалиги раҳбари Ғолибжон Рўзибуваев. – У иш сифатини яхшилаш, хосилдорликни ошириш, қишлоқ хўжалик маҳсулотларини етиштиришда самара беряпти. Натижада чорва маҳсулотлари гўшт, сут етиштириш ҳажми 1,5 баробарга ошди ва таннархи қисқарди. 

Аслида Ғолибжоннинг омади келган. Унга беш йилга 500 миллион сўм имтиёзли, яъни 19 фоизли кредит берилди. Франция тараққиёт агентлиги кредитининг яна бир имтиёзи бор. Агар кредит олувчи янги трактор сотиб олгач, чорвачиликда ишлаб чиқарилаётган маҳсулот ҳажмини оширса, олган кредитнинг 30 фоиздан 40 фоизгача грант сифатида ўзига қайтарилади. Шундай қилиб, “Қувасой Рўзибуво янги боғи” фермер хўжалиги олган 500 миллион сўм кредитнинг 150 миллион сўми гўшт, сут, тухум ҳажмини оширгани учун грант сифатида ўзига беғараз қайтариб берилди.

<iframe width="650" height="420" src="https://www.youtube.com/embed/541MqYXwOM8" title="Kreditning bir qismi grant sifatida qaytarildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов (видео,сурат), ЎзА мухбирлари