Бугунги кунда Марказий банк томонидан молиявий барқарорликни таъминлаш ҳамда банк тизимида ошкораликни кучайтиришга қаратилган изчил ислоҳотлар амалга оширилаётгани билан бир қаторда айрим тижорат банклари томонидан кредит тўловлари кечиктирилган ҳолларда юқори пеня, оширилган фоиз ставкалари ва қўшимча жарималар қўлланилмоқда.
Бу ҳолатлар эса жамоатчилик ва тадбиркорлар ўртасида ҳақли эътирозларга сабаб бўлмоқда. Бундай амалиётлар, айниқса, кичик бизнес ва оилавий тадбиркорлик субъектларининг молиявий барқарорлигига салбий таъсир кўрсатаяпти.
Қонунчилик палатаси депутати, O‘zLiDeP фракцияси аъзоси Диёр Ҳусанов айнан шу ҳолатларни инобатга олган ҳолда Ўзбекистон Республикаси Марказий банки раиси Тимур Ишметовга депутатлик сўрови юборди.
Сўровда тадбиркорлар ва аҳоли ўртасида келиб тушаётган мурожаатлар, шунингдек, банк амалиётида кузатилаётган муаммоли жиҳатлар алоҳида қайд этилган.
Хусусан, депутат кечиктирилган тўловлар учун қўлланилаётган санкцияларнинг молиявий юкламасини камайтириш бўйича Марказий банк томонидан қандай чоралар кўрилаётгани, пеня, фоиз ва жарималарни адолатли ҳамда мутаносиб қўллашга қаратилган қонунчилик ташаббуслари юзасидан аниқ ва асослантирилган тушунтириш беришни сўраган.
М.Комилова, ЎзА