Бухоро вилояти Қоровулбозор туманида чорвачилик билан бир қаторда паррандачиликка ҳам эътибор қаратилаётгани туфайли бугун бу турдаги ихтисослаштирилган хўжалик сони ортмоқда.

Айни кунда Қоровулбозор тумани Навбаҳор маҳалласи ҳудудида фаолият юритаётган “Vigour Export” МЧЖда ҳам паррандачилик тармоғига дахлдор, қиймати 11 миллиард сўмлик лойиҳа амалга оширилди. Бу сармоянинг 3 миллиард сўми тадбиркор Анвар Ҳамраев бошлиқ мазкур масъулияти чекланган жамиятнинг маблағи эвазига тўғри келади. 

– Фаолиятимизни бошлаганимизга 3 йилдан ошди. Хитой технологияси асосида товуқхона павильонини барпо этиб, уларда 50 минг бошдан ортиқ “Loman Sendi” зотли парранда парваришланмоқда.  Яқин 1-2 ой ичида 100 минг товуққа мўлжалланган иккинчи павильон ишга туширилади. Ҳозирда 16 нафар ишчилар меҳнат қилаётган бўлса, лойиҳанинг иккинчи босқичи ишга тушиши натижасида яна 10 та янги иш ўринлари яратилади. Корхонада жорий йилнинг март ойида қиймати 120 минг АҚШ доллари бўлган тегирмон ўрнатилди. Мазкур тегирмон соатига 5 тонна озуқа ишлаб чиқариш қувватига эга. Шу вақтга қадар озуқалар бозордан сотиб олинган бўлса, эндиликда озуқалар шу ернинг ўзида ишлаб чиқарилмоқда, – дейди Анвар Ҳамраев. 

Бу каби корхоналарнинг кўпайиши озиқ-овқат хавфсизлигини таъминлаш билан бир қаторда, аҳоли даромадларини оширишга хизмат қилаётганлиги билан ҳам аҳамиятлидир.

Зариф Комилов, ЎзА мухбири.