Андижон шаҳри маҳаллаларида коррупциянинг олдини олиш, коррупцион ҳолатларни келтириб чиқарадиган омилларни бартараф этиш, аҳолининг ушбу иллатга қарши муросасиз муносабатини шакллантириш масалаларига бағишланган йиғилиш ва тадбирлар бўлиб ўтмоқда.

Давлатимиз раҳбари Шавкат Мирзиёев раҳбарлигида бўлиб ўтган Коррупцияга қарши курашиш бўйича миллий кенгашнинг кенгайтирилган йиғилишида бу умуммиллий вазифа эканлиги, ҳар бир юртдошимиз ушбу иллатнинг олдини олиш ва бартараф этилишига бефарқ қарамаслиги, четда турмаслиги лозимлиги таъкидланиб, мазкур йўналишда муҳим вазифалар белгиланган эди. 

Ҳақиқатдан ҳам жамиятимиз ривожи ва мамлакат тараққиётига жиддий тўсиқ бўлиб, соҳалар юксалишига бевосита таҳдид туғдирадиган энг хавфли иллат – коррупциядир. Шу боис унга қарши курашиш масаласи давлатимиз сиёсатининг асосий йўналишларидан бирига айланган. Бу борадаги ишлар самарадорлигини оширишда эса жамоат ташкилотлари, сиёсий партиялар ҳам фаол иштирок этмоқда. 

Хусусан, Ўзбекистон “Адолат” СДП томонидан апрель ойи мамлакатимизда “Коррупцияга қарши курашиш ойлиги”, деб эълон қилиниб, ҳудудларда коррупциянинг илдизини таг-томири билан қуритишга қаратилган тадбирлар ўтказилмоқда. 

“Адолат” СДП Андижон вилоят Кенгаши ташаббуси билан Андижон шаҳридаги Ишчилар маҳалласида ташкил этилган тадбирда тиббиёт тизимида коррупциянинг олдини олиш хусусида атрофлича сўз юритилди. 

Тадбирда партия фаоллари, партия аъзоси бўлган тиббиёт ходимлари иштирокчиларга юртимизда тиббий хизмат ва аҳоли саломатлигини сақлаш, бу борада кўрсатиладиган бирламчи хизматлар бепул эканлигини тушунтирди. Жойлардаги оилавий шифокорлик пунктлари аҳолига энг яқин тиббий хизмат кўрсатувчи муассаса бўлиб, ҳар бир оила уларнинг назоратида бўлиши, тиббий хизматлардан фойдаланиш ҳақида кенг маълумотлар берилди. Бу борада фуқаролар коррупцион ҳолатларнинг олдини олишда фаол бўлиши муҳим эканлиги алоҳида қайд этилди. 

– Маҳалламизга бириктирилган патронаж ҳамширалар ҳар бир оилага кириб боради, – дейди Андижон шаҳридаги “Ишчилар” МФЙ раиси Жамила Дарвишева. – Фуқароларимиз кўрсатилаётган тиббий хизматлардан мамнун. Айримлар тиббиётда коррупция ҳолатлари кўп, деб ҳисоблашади. Лекин бизнинг маҳалламизда, оилавий поликлиникамиз томонидан кўрсатилаётган хизматларда фуқароларимиз коррупцион ҳолатларга дуч келмаган. Қолаверса, “Адолат” СДП фаоллари томонидан ўтказилган тадбирда маҳалладошларимизга бу ҳақда янада кенгроқ тушунча ва маълумотлар берилди. Жиноятга энг аввало, ўзимиз йўл бермаслигимиз керак. 

Тадбир доирасида маҳалла аҳолиси учун бепул, сайёр тиббий кўрик ташкил этилди. 

Ф.Убайдуллаев,
З.Умрзоқов (сурат), ЎзА мухбирлари