ФОТОРЕПОРТАЖ
Коррупцияга қарши курашиш бўйича миллий Кенгашнинг жорий йил 5-март куни ўтказилган кенгайтирилган йиғилишида Президентимиз Шавкат Мирзиёев томонидан билдирилган фикрлар, берилган топшириқларни халқимизнинг барча қатламларига етказиш, халқнинг ҳуқуқий маданиятини оширган ҳолда келгусида жамиятимизда коррупциянинг туб илдизларига барҳам бериш мақсадида Ўзбекистон “Адолат” СДП Сиёсий Кенгаши ташаббуси билан республикамизнинг барча ҳудудларида апрель ойи коррупцияга қарши курашиш ойлиги, деб эълон қилинди.
Ойлик доирасида Фарғона шаҳар касбий кўникмалар марказида “Аҳолининг коррупцияга қарши курашишда фаоллигини ошириш – қонун устуворлиги гарови” мавзусида оммавий тарғибот тадбири ташкил этилди. Унда Партиянинг Фарғона вилоят Кенгаши раиси ўринбосари Орифжон Ўлмасов, Халқ депутатлари Фарғона шаҳар Кенгаши депутати Бекзод Мамажонов, Жиноят ишлари бўйича Фарғона шаҳар суди судьяси Одилжон Исмоилов иштирок этди.
– Коррупция нафақат давлат ва жамият равнақига таҳдид солади, балки уни юзага келтирувчи инсонларни ҳам ҳаётига соя ташлаши, қонун олдида жавобгарлигига сабаб бўлади, - деди жиноят ишлари бўйича Фарғона шаҳар суди судьяси О. Исмоилов. – Рақамларга мурожаат қиладиган бўлсак, биргина жорий йилнинг ўтган январь-февраль ойлари давомида коррупция билан боғлиқ 102 нафар шахсга нисбатан 63 та жиноят иши кўриб чиқилган. 99 нафар шахсга нисбатан 60 та жиноят иши бўйича айблов ҳукми чиқарилган. Уларнинг 17 нафарига жарима, 1 нафарига муайян ҳуқуқдан маҳрум қилиш, 47 нафарига ахлоқ тузатиш ишлари, 7 нафарига озодликни чеклаш, 25 нафарига озодликдан маҳрум қилиш жазоси тайинланган.
Бу жиноятлар банк тизимида ходимлари, тадбиркорлик субъектлари, мактабгача ва мактаб таълим ташкилотлари, соғлиқни сақлаш тизимларида кўпроқ содир этилганини кўриш мумкин.
Тадбир давомида иштирокчилар жамиятда содир этилаётган коррупцион ҳолатлар ва уларни олдини олиш борасида ўз фикр-мулоҳазалари ва таклифларини билдирди.
Оммавий тарғибот тадбирлари жойларда давом этмоқда.
Муқимжон ҚОДИРОВ (сурат), ЎзА