Коррупцияга қарши курашиш ҳар бир соф виждонли инсоннинг, демократик жамият ва давлатнинг муқаддас бурчидир. Мамлакатимизда коррупциянинг олдини олиш, унга қарши курашиш бўйича қонунлар қабул қилиниб, зарур чоралар кучайтирилмоқда.

Наманган вилоятининг Тўрақўрғон туманида жойлашган “Тўрақўрғон иссиқлик электр станцияси” корхонасида “Иссиқлик электр станциялари” акциядорлик жамиятининг коррупцияга қарши курашиш ва комплаенс бошқармаси ташаббуси билан ўтказилган мулоқотда давлат ва жамият ривожига болта урадиган иллат хусусида атрофлича сўз юритилди.

Давра суҳбатида Тўрақўрғон тумани прокуратураси ҳамда Давлат хавфсизлиги хизмати масъул ходимлари иштирокида кечган тадбирда станция раҳбарияти, таркибий бўлинмалар бошлиқлари ва уларнинг ўринбосарлари, бошқа масъул мутахассислар қатнашди. 

“Иссиқлик электр станциялари” акциядорлик жамиятининг коррупциянинг олдини олиш ва “комплаенс-назорат” бошқармаси масъул ходими Баҳодир Нишонхўжаев жорий йилнинг 5 март куни Президентимиз раислигида ўтказилган йиғилишда белгилаб берилган устувор йўналишлардан келиб чиқадиган долзарб вазифаларга батафсил тўхталди.

Қайд этилганидек, коррупция – жамият тараққиётининг кушандаси, давлат ва жамият учун жиддий хавф. Шу боис юртимизда, хусусан иссиқлик электр станциялари тизимида ҳам бу иллатга қарши кескин ва муросасиз курашиш, инсон омили билан боғлиқ ортиқча тўсиқ ва бюрократик ҳолатларга барҳам бериш йўлида кенг кўламли чора-тадбирлар амалга оширилмоқда. 

Тадбирда, иштирокчиларни коррупцияга қарши курашиш борасида “Иссиқлик электр станциялари” акциядорлик жамияти томонидан ишлаб чиқилган ва амалга киритилган меъёрий-ҳуқуқий ҳужжатлар билан таништирилди. Коррупцияга қарши курашишда, шу жумладан, маиший соҳадаги коррупция иллатларига қарши ҳамжиҳатликда бўлиш, бу борада фидойилик кўрсатиш, ҳар бир ишга масъулият билан ёндашиш лозимлиги қайд этилди.

Оқилхон Дадабоев, ЎзА.