Муносабат

Сўнгги йиллар мамлакатимизда коррупциянинг олдини олиш ва унга қарши курашиш, давлат ва жамият қурилишининг барча соҳаларида коррупция омилларига чек қўйишга қаратилган кенг кўламли ислоҳотлар амалга оширилди. 

Президентимиз жорий йил 5 март куни ўтказилган Коррупцияга қарши курашиш миллий кенгаши йиғилишида ҳам юртимизда коррупциядан ҳоли муҳит яратиш бўйича қилинган ишларга баҳо берилиб, келгуси вазифалар белгиланди. 

Коррупция бутун инсониятга, барча жамиятлар асосига, иқтисодий тараққиётга зарба берадиган, қонун устуворлигини бузадиган ва халқнинг давлат сиёсатига ишончини кескин сусайтирадиган, демократик институтлар ривожига тўсқинлик қиладиган хатарли таҳдиддир ва у барқарор ривожланиш мақсадларига эришиш борасидаги режаларга ҳам жиддий путур етказади. 

Ҳозирда судлар томонидан низоларни ҳал этиш жараёнида ҳар қандай коррупцион ҳолатларнинг олдини олиш ва барҳам бериш, аҳоли ва тадбиркорларнинг ҳуқуқий онгини юксалтириш, коррупциявий ҳолатлар аниқланган тақдирда ҳуқуқни муҳофаза қилувчи органларга хабар бериш тартиби йўлга қўйилган. 

Масалан, ўтган йил иқтисодий судлар томонидан Ўзбекистон Республикасидаги товар ёки молия бозорида рақобатнинг чекланишига, рақобат ёки табиий монополия шароитларида истеъмолчиларнинг ҳуқуқлари ва қонуний манфаатлари камситилишига олиб келадиган ёки олиб келиши мумкин бўлган ҳаракатларнинг олди олиниши, давлат харидлари жараёнларида қонунийлик принципларига амал қилиниши борасида кўплаб ишлар амалга оширилди. 

Тошкент вилояти иқтисодий судлари томонидан 2024 йил давомида давлат харидлари билан боғлиқ ишларни кўришда, ишда иштирок этувчи шахслар шартномавий муносабатга киришишда давлат харидлари тартиб-таомилларига риоя этилмаётган ҳолатлар аниқланди. Қарийб юздан ортиқ ҳолат бўйича тегишли ваколатли органларга хусусий ажрим юборилиб, аниқланган қонунбузилишлар бўйича хабар берилган. Аслида давлат харидлари тартибга солиниши, тўғридан-тўғри харидлар чекланиши ҳисобига бюджет маблағлари тежалиши таъминланади. 

Тадбиркорларнинг ва инвесторлар ҳуқуқларининг қонуний ҳимоя қилиниши ва ўзаро рақобат муҳитининг ривожланиб бориши, мамлакатнинг инвестициявий жозибадорлигининг ошишида ҳам муҳим аҳамият касб этади. Коррупция, жамиятда адолатсизлик, тенгсизлик ва аҳолининг норозилигига олиб келади, бу эса барча соҳадаги ислоҳотларнинг натижасига салбий таъсир этмай қолмайди. 

Фуқароларимизда ҳуқуқий онг ҳамда ҳуқуқий маданиятнинг етарли даражада эмаслиги, ўз ҳақ-ҳуқуқини ҳимоя қила олмаслиги жамиятда адолат мезонининг бузилишига олиб келади. “Юксак ҳуқуқий маданият – мамлакат тараққиёти кафолати “ деган ғоя асосида сайёр суд мажлисларида, аҳоли билан бўлган учрашувларда уларнинг ҳуқуқий саводхонлигини ошириш борасида Тошкент вилоят судининг судья ва суд ходимлари томонидан тизимли равишда кенг қамровли ҳуқуқий тарғибот тадбирлари амалга оширилмоқда.

Коррупциядан ҳоли қонун устуворлиги таъминланган ҳуқуқий демократик давлат барпо этишда ҳар биримиз ўз ҳиссамизни қўшмоғимиз лозим. Зеро, коррупцияга қарши курашиш ҳар бир соф виждонли инсоннинг, демократик жамият ва давлатнинг муқаддас бурчидир. 

А.Икромов, 

Тошкент вилоят судининг иқтисодий 

ишлар бўйича судлов ҳайъати раиси. 

ЎзА