Қашқадарё вилояти Миришкор тумани Помуқ шаҳарчасида “Дўстлик ва ҳамжиҳатлик улуғланган юрт” шиори остида миллатлараро тотувлик ва ҳамдўстликни мустаҳкамлашга бағишланган умумхалқ сайллари ҳамда концерт дастури ташкил этилди.

Кўп миллатли Миришкор тумани қўшни Туркманистон билан чегарадош ҳудуд ҳисобланиб, 132 минг нафардан ортиқ аҳоли истиқомат қилади. Ҳудудда тожик, туркман, араб, татар, рус, қирғиз, қозоқ каби ўнлаб миллат вакиллари бугунги қадар тинч ва тотув умргузаронлик қилиб келмоқда.  

Тадбир давомида Помуқ шаҳарчасида яшовчи ўзга миллат вакиллари ва миллий марказларининг фольклор жамоалари иштирок этиб, миллий рақс ва қўшиқларини ижро этишди. Улар томонидан ташкил этилган миллий таомлар кўргазмаси намойиши эса тадбирда иштирок этувчиларда катта таассурот қолдирди.

[gallery-22582]

– Қадимдан туркман оиласида мол сўйилганда “шўлат” таоми тайёрланган, – дейди Помуқ шаҳарчаси хотин-қизлар фаоли Насиба Қодирова. – Молнинг ўпкаси, жигари, буйраги, юраги ва гўштидан қўшиб қиймаланиб, зираворлар солинади, ўзидан чиққан чарвисига ўралади ва тикилади. Уни шўрвага солиб пиширилади. Битта катта молнинг чарвисидан 25 тагача шўлат чиқиши мумкин. Таом қўни-қўшниларга ҳам улашилган. Унинг тарихи жуда узоқ ўтмишга бориб тақалади. Бугунги кунгача туркман оилаларида тайёрланиб келинади. Жуда қувватли ва мазали таом ҳисобланади.    

Байрам дастурида иштирок этган Ўзбекистон Республикаси Ўзбекистон Республикаси Президенти маслаҳатчисининг ўринбосари - Халқ қабулхонаси раҳбари Улуғбек Муҳаммадиев ва Қашқадарё вилояти ҳокими Муротжон Азимов барчани улуғ айём Ҳайит байрами билан самимий қутлади.

Шунингдек тадбир доирасида ўтказилган қорабайир зотли отлар, қоракўл қўчқорлари, ўрмон бўлимининг декоратив ҳайвонлари чиқишлари барчада катта таассурот қолдирган бўлса, ташкил этилган спорт мусобақалари баҳс-мунозараларга бой бўлди.  

Ўлмас Баротов, Жамшид Норқобилов (сурат), ЎзА мухбирлари