Корея марказий ахборот агентлиги (KCNA) хабар беришича, КХДР етакчиси Ким Чен Ин яқинда мамлакат гвардияси биринчи ҳаво дивизиясига қарашли ҳарбий қисмга ташриф буюриб, у ерда қирувчи самолётлар, вертолётлар, дронлар ва ракетага қарши мудофаа бўлинмалари иштирокидаги машғулотларни кузатган.

Ҳарбийлар билан бўлган учрашувда у ҳар қандай ташқи тажовузга қарши тайёргарликни асло сусайтирмасликка чақирган.

Шимолий Корея давлат телевидениесининг машғулотлардан олган кадрларида МиГ-29 самолёти ҳавога ракета учираётгани акс этган. 

– Бу Россия томонидан ишлаб чиқарилган ўрта ва узоқ масофага мўлжалланган ҳаво ракетасининг КХДР намунасига ўхшайди, -деди Корея Миллий бирлашиш институтининг таҳлилчиси Хонг Мин.

Шу ой ичида Ким ракета синовларини кузатди, танк ва ўқ-дорилар заводларини кўздан кечирди, РФнинг Пхеняндаги элчихонасига ташриф буюриб, мамлакатнинг Россия билан иттифоқчилигини тасдиқлади. Шунингдек, у танкдан ўқ отиш ва махсус операциялар бўлинмаларининг машғулотларини назорат қилди.

Ким Чен Ин КХДРни Қўшма Штатларнинг терроризмга қарши кураши бўйича ҳамкорлик қилмайдиган давлатлар рўйхатига киритгани учун АҚШ Давлат департаментини танқид қилди.

Пхеньян 1997 йилдан бери ҳар йили рўйхатга киритилади, деб ёзмоқда Жанубий Кореянинг “Yonhap” ахборот агентлиги. 

– АҚШ бизни самарасиз ва ғаразли хатти-ҳаракатлари билан қанчалик кўп провокация қилса, КХДР ва Америка ўртасидаги муросасиз адоватни шунчалик кучайтиради, — деди Шимолий Корея ТИВ вакили. 

Ў.Алимов, ЎзА