“Financial Times” журнали қўлга киритилган ҳужжат нусхасига таяниб ёзишича, Украина Россияга ҳудудий имтиёз берилиши ва фронт чизиғи музлатилиши каби келишув шартларига қарши чиқиб, Москвадан ўт очишни тўхтатиш ва товон тўлашни талаб қилмоқда.

– Ҳужжатга кўра, Украина Россия учун ҳудудий имтиёз акс этган ҳеч қандай битимни қабул қилмайди ва тўлиқ тинчлик келишувига эришиш учун биринчи қадам сифатида ўт очишни тўхтатиш талабини қўяди, – дейилган баёнотда. – Киев фронтнинг қолган қисмини музлатиш таклифини рад этади. Россиянинг музлатилган активи билан қопланиши мумкин бўлган товон сўрайди. Украина АҚШдан хавфсизлик кафолати олиш бўйича келишув доирасида, Европа маблағидан фойдаланган ҳолда, АҚШдан 100 миллиард долларлик қурол сотиб олишга ваъда беради. Киев ва Вашингтон Украина компаниялари билан дрон ишлаб чиқариш бўйича 50 миллиард долларлик шартнома тузиши мумкин.

Трамп кеча Зеленский ва Европа етакчилари билан музокара ўтказди. Очиқ суҳбат бор-йўғи ярим соат давом этди. Мулоқотда НАТО Бош котиби Марк Рютте, Еврокомиссия раҳбари Урсула фон дер Ляйен, Буюк Британия Бош вазири Кир Стармер, Франция Президенти Эммануэль Макрон, Германия Канцлери Фридрих Мерц, Финляндия Президенти Александр Стубб, Италия Бош вазири Жоржа Мелони ва Украина Президенти Владимир Зеленский иштирок этди.

АҚШ Президенти ижтимоий тармоқ орқали суҳбат “жуда самарали” кечганини ёзган. Унинг сўзларига кўра, томонлар Украина учун қатор Европа давлатлари томонидан АҚШ билан келишилган ҳолда тақдим этиладиган хавфсизлик кафолатини муҳокама қилган. Шунингдек, Трамп Путин ва Зеленский ўртасидаги учрашув, сўнгра ўзининг шахсан иштирокида уч томонлама музокарага тайёргарлик кўришини ҳам эълон қилган.

Кремль хабарида учрашувдан сўнг Трамп РФ етакчиси Владимир Путинга қўнғироқ қилиб, Оқ уйдаги мулоқот якуни юзасидан маълумот бергани айтилган. Давлат раҳбари ёрдамчиси Юрий Ушаков таъкидлашича, суҳбат самимий ва конструктив тарзда ўтган.

С.Раҳимов, ЎзА