Юртимиз бўйлаб амалга оширилаётган “Яшил макон” умуммиллий лойиҳаси доирасида Бухоро вилояти Қоровулбозор туманида ҳам иқлим шароитига мос мевали ва манзарали кўчатлар ўтқазилиб, парвариши уюшқоқлик билан олиб борилмоқда.

Қоровулбозор давлат ўрмон хўжалиги жамоаси деҳқон ҳамда фермер хўжаликларига ўзида етиштирилаётган 30 га яқин турдаги дарахт ниҳолларини етказиб беришда таъминотчи вазифасини бажармоқда. Мазкур давлат ўрмон хўжалиги томонидан 50 гектардан иборат кўчат етиштириш контурида элликка яқин ишчи-мутахассис меҳнат қилмоқда.

Хўжаликда бугунга келиб 350 минг тупдан ортиқ кўчат тайёрланган бўлиб жумладан, қайрағоч, садақайрағоч, кулён, сасна, катальпа, межавельник, тут ва ясин каби кўчатларга талаб юқори бўлмоқда. 

Мана шундай, саъй-ҳаракат туфайли вилоятнинг кенжа туманида  “Ўзнефтгазқудуқтаъмирлаш” акциядорлик жамияти жамоаси томонидан ўтган йили “Чўлқувар” маҳалла фуқаролар йиғинидан 4,5 гектар алоҳида ер майдони обод қилиниб, боғ барпо этишга киришилган. Мазкур боғда 2 минг тупдан ортиқ қайрағоч ҳамда 3 минг тупдан ортиқ олманинг серҳосил навига мансуб ниҳол ўтқазиб парваришланмоқда.

Акциядорлик жамияти меҳнат жамоаси жорий йилда ҳам ташаббус кўрсатиб,  “Навбаҳор” маҳалла фуқаролар йиғинидаги 9 гектар ер майдонини ободонлаштириб, боғ яратишга киришган. 

Зариф Комилов, ЎзА мухбири.