“Яшил макон” умумхалқ ҳаракатига айланди. Фарғона вилоятида дастлабки йилда дарахт ва гуллар экилиб, кўча-хиёбонлар ободонлаштирилган эди. Бу йил эса улкан майдонларда янги боғ ва кичик ўрмонлар яратилмоқда. Масалан, эрта баҳорда Қува тумани ҳудудидаги Каркидон сув омбори атрофидаги 258 гектар майдон ўзлаштирилди. Бир неча кун давомида минглаб фарғоналиклар бу ерда қатъий режа ва лойиҳа асосида қатор-қатор дарахт кўчатлари экдилар. Бор- йўғи бир-бир ярим ой ўтди. Мунтазам қаров туфайли –бугун уларнинг деярли барчаси халқ тилида айтганда “тутиб қолди”.

– 108 минг туп дарахт экилди, – дейди Фарғона вилояти ҳокимлиги шуъба раҳбари Асилбек Неъматов. – Клён, сафора, арча каби 15 турдаги салқин берувчи, ўзидан кислород чиқарувчи ҳамда манзарали дарахтлар экдик. Уларнинг ҳар бири учун ташкилот, тадбиркор ва аниқ шахслар бириктирилган бўлиб, суғориш ишлари уларга юклатилган. 

Қувадаги бу ташаббус– Каркидон сув омбори атрофида яшил ҳудуд ва дам олиш масканлари яратиш вилоят миқёсидаги лойиҳа бўлгани учун ҳам шаҳар-туманлардаги сув ташиш машиналари суғориш ишига ёрдамга келди. Қир-адирларнинг тепаларига эса ҳозирча сиғимлар қўйиб, томчилатиб суғориш ташкил этилди. Энди бу ерларга 13 та тик қудуқ қазилади ва 258 гектарнинг барчаси замонавий усулда суғорилади.

Каркидон сув омбори 1964 йилда қурилган бўлиб, 180 млн. кубметр сув сақлаш қувватига эга. У деҳқончилик учун хизмат қилади. Аммо ҳамиша тоза ҳаво эсадиган қир-адирлар ўртасида жойлашган. Шунинг учун ҳам вилоят ҳокимининг ташаббуси билан бу ерда сайёҳликка қаратилган 200 га яқин лойиҳа ишлаб чиқилди. Унга кўра: 

– Дор йўллари, ресторанлар, 10 гектарда эса гулбоғ қуриш ишларини бошлаймиз. Гулбоғни Дубайдаги гуллар боғи лойиҳаси асосида ташкил этамиз, – дейди Асилбек Неъматов. –Шунингдек, сув омборининг юқори қисмида 400 ўринга мўлжалланган кўп қаватли меҳмонхона қурилади. Бундан ташқари, сув бўйларига коттежлар қурилади. Уларни оилавий дам олиш масканига айлантирамиз. 

Сув омборининг икки ёнидаги тепаликлар орасига дор йўли тортилиб, ҳаракатланувчи осма кабиналар қўйилади. Улар икки қирғоқни бир-бири билан боғлайди ва дам олувчиларда унутилмас таассурот қолдиради.

Сув омбори бўлганидан кейин унинг қирғоқларида чўмилиш, сув аттракционлари бўлиши лозим. Ҳозирча қирғоқлар таъмирталаб, аниқроғи, талабларга жавоб берадиган қилиб қайтадан жиҳозланиши лозим.

– Биринчи босқичда шағал ётқизилади ва кетидан қум билан қоплаймиз. Натижада аҳоли ва сайёҳлар учун қулай дам олиш масканига айланади, – дейди Асилбек Неъматов. – Бу ерда чўмилиш, ювиниш, қуёш нурида тобланиш имкони яратилади. Болажонлар учун қумлик бурчаклари ташкил қилинади. Ҳар ер - ҳар ерда енгил овқатланиш тамаддихоналари ҳам очилади. 

Фарғонанинг оромижон Шоҳимардону, Сўх каби дам олиш қишлоқларидан ташқари Каркидон, Ёзёвон сув омбори, Чимён, Аввал каби зиёратгоҳлари ва яна бир неча масканлари бор. 

Фарғона вилояти ҳокимлиги уларнинг ҳар бирида сайёҳликни ривожлантириш лойиҳаларини амалга оширмоқда.

<iframe width="650" height="420" src="https://www.youtube.com/embed/qVKVIPIJOJM" title="Karkidon suv ombori atrofida sayyohlik majmuasi yaratiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳаммаджон Обидов, Элёр Олимов(видео,сурат), ЎзА мухбирлари