ФОТОРЕПОРТАЖ

Мамлакатимизда “Камбағалликдан фаровонлик сари” дастури доирасида оилаларни камбағалликдан чиқариш, уларни фаровон турмуш шароитлари билан таъминлаш борасида кенг кўламли ишлар амалга оширилмоқда. Жорий йил Қорақалпоғистон Республикасида ҳам 1100 оилани камбағалликдан чиқариш режалаштирилган бўлиб, бу борада манзилли йўл харитаси белгиланган.

Оғир ҳудудга киритилган 89 маҳаллада фуқароларга муносиб турмуш шароитини яратиш, бандлигини таъминлаш, субсидиялар ажратиш орқали ўзини ўзи таъминлашга кўмаклашиш йўналишида босқичли ишлар олиб борилмоқда. Жараёнда томорқадан унумли фойдаланиш масаласига алоҳида эътибор қаратилаётир. 

[gallery-22658]

Томорқачиликда суғориш масаласи аҳамиятли мавзу. Шу боис, бугунги кунда оғир ҳудудга киритилган маҳаллаларда томорқа ерларига каналлардаги оқар сувларни етказиб бериш ишлари бажарилмоқда. Нукус шаҳридаги “Саманбой” маҳалла фуқаролар йиғини аҳолисининг ушбу хайрли ишлардан кўнгли тўқ. Чунки, уй олди томорқаларини суғоришда қийинчиликларга дуч келаётган аҳолининг муаммоси ечим топмоқда. 

Маҳалла ҳудудидан оқиб ўтивчи Бӯзатов канали ёнидан қуввати 2500 метр куб сувни тиндириш имкониятига эга, узунлиги 70 метр, эни 12 метр ва чуқурлиги икки ярим метр бўлган сув омборининг қурилиш ишлари жуда қизғин. Қурилиш “Aralmexanizatsya” масъулияти чекланган жамияти томонидан олиб бориляпти. Жараёнга 50 нафарга яқин ишчи ва бир нечта техника жалб этилган. Томорқа ер эгаларига оқар сувни етказиб бериш учун барча имкониятлар ишга солинган. Режа бўйича 5 километрдан ортиқ сув тармоқларини тортиш белгиланган бўлиб, ҳозирда ишлар якунланиш арафасида. 

Лойиҳа самарасида маҳалладаги 947 та хонадоннинг томорқаси оқар сув билан таъминланади.

Мақсад ҲАБИБУЛЛАЕВ (сурат), ЎзА