Жиззахда вилоят ҳокимлиги, “Aгробанк” раҳбар ва вакиллари тадбиркорлар билан учрашиб, уларнинг муаммоларини тинглади ва мурожаатларини ҳал этди.

Жиззах вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Зафар Aзимов, Республика Марказий банк департаменти директори Даврон Каримов ҳамда “Агробанк” АТБ Кузатув кенгаши бошқарув раиси ўринбосари Воҳид Очиловлар воҳадаги экспортчи тадбиркорлар билан очиқ мулоқот ўтказди.

Учрашувда тадбиркорларнинг муаммо, таклиф ва ташаббуслари атрофлича муҳокама қилинди.

Мулоқот давомида тадбиркорлар ўз фаолиятида дуч келаётган тўсиқлар, жумладан, молиявий ресурсларга кириш имкони, экспорт жараёнларидаги қийинчиликлар, божхона ва логистика масалалари бўйича ўз фикр-мулоҳазаларини билдирди. 

Шу билан бирга, ишлаб чиқариш ҳажмини ошириш, янги иш ўринлари яратиш ҳамда маҳаллий маҳсулотларни халқаро бозорларга олиб чиқиш масалалари атрофлича муҳокама қилинди.

[gallery-22656]

Тадбирда вилоят раҳбарияти тадбиркорлар томонидан кўтарилган муаммоларни ҳал қилишга қаратилган амалий чораларни ишлаб чиқиб, тегишли мутасадди ташкилотлар вакилларига аниқ топшириқлар берилди, ҳар бир масала бўйича мониторинг олиб бориш ҳамда тезкор ечимлар ишлаб чиқиш бўйича келишиб олинди.

Тадбиркорлар ўз навбатида ҳукумат томонидан кўрсатилаётган қўллаб-қувватлов ва имтиёзларнинг аҳамиятини таъкидлаб, бизнес муҳитини янада яхшилаш бўйича ўз таклифларини илгари сурди. 

Жумладан, тадбиркорлар учун кредит ресурслари, солиқ енгилликлари ва инвестиция муҳитини яхшилаш бўйича қўшимча ташаббуслар илгари сурилиши зарурлиги қайд этилди.

Бундай учрашувлар вилоятда тадбиркорликни ривожлантириш, инвестицион жозибадорликни ошириш ҳамда маҳаллий ишлаб чиқарувчиларнинг экспорт салоҳиятини кенгайтириш йўлида муҳим аҳамият касб этади.

Учрашув натижаларига кўра, тадбиркорлар ва вилоят ҳокимлиги ҳамда республика банклар раҳбарияти вакиллари ўртасидаги очиқ мулоқотларни доимий равишда давом эттириш ҳамда муаммоларни тезкор ҳал қилиш бўйича махсус ишчи гуруҳлар ташкил этилиши белгилаб олинди.

Бу каби мулоқотлар тадбиркорларнинг ҳуқуқ ва манфаатларини ҳимоя қилиш, уларнинг фаолиятини қўллаб-қувватлаш ва иқтисодий ўсишни жадаллаштириш йўлида самарали платформа сифатида хизмат қилади.

А.Қаюмов, Ж.Ёрбеков (сурат), ЎзА мухбирлари