Жиззах вилояти Зарбдор туманидаги асосан қирғиз миллатига мансуб фуқаролар кўпроқ истиқомат қилаётган “Андижон” маҳалла фуқаролар йиғинида ҳам миллатлараро дўстлик ва ҳамжиҳатликни янада мустаҳкамлашга бағишланган байрам кенг нишонланди.

“Ватан ягонадир, Ватан биттадир” шиори остида бўлиб ўтаётган ушбу “Миллатлар дўстлиги” байрами тадбири турли миллат ва элат вакилларининг ҳамжиҳатлигини янада мустаҳкамлаш, ўзаро ҳурмат ва аҳиллик муҳитини кучайтириш мақсадида ташкил этилди.

Тадбир давомида миллий урф-одат ва анъаналар, халқ ўйинлари намойиш этилди. Санъаткорлар томонидан куй-қўшиқлар ижро этилди, фольклор жамоаларининг чиқишлари байрамга алоҳида файз бағишлади.

Меҳмонлар учун миллий таомлар ва ҳунармандчилик маҳсулотлари кўргазмаси ташкил этилди. Ташриф буюрувчилар турли миллатларнинг анъанавий таомлари ва санъат асарлари билан танишиш имкониятига эга бўлдилар.

[gallery-22619]

Туман ҳокими Бекзод Ташпўлатов барча иштирокчиларни қутлаб, Хўжанд шаҳрида Ўзбекистон, Тожикистон, Қирғиз Республикаси Президентларининг тарихий учрашуви мамлакатларимиз ўртасидаги миллатлараро тотувлик, дўстлик ва ҳамжиҳатлик муҳитининг тобора мустаҳкамланиб бораётганидан далолат эканини алоҳида таъкидлади. 

Байрам иштирокчилари “Яшил макон” умуммиллий ҳаракати доирасида ”Дўстлик боғи”га мевали ва манзарали дарахт кўчатлари ўтқазишди.

Тадбир доирасида аҳоли учун арзонлаштирилган озиқ-овқат ярмаркаси ташкил этилди. Шунингдек, турли миллат вакилларига ҳурмат бажо келтирилиб, уларга миллий либослар совға қилинди.

Тадбир якунида тинчлик ва бирдамлик рамзи сифатида осмонга кабутарлар учирилди.

“Миллатлар дўстлиги” байрами ўзаро ҳурмат, миллий қадриятлар ва барқарор тараққиёт тимсоли бўлиб, у миллатлар ўртасидаги тотувлик ва ҳамкорликни янада мустаҳкамлашга хизмат қилади.

А.Қаюмов, Ж.Ёрбеков (сурат), ЎзА мухбирлари