Жиззах вилоятида ФВБ ва унинг туман бўлимлари ходимлари томонидан “Фавқулодда вазиятлардан муҳофаза қилиш ва фуқаро муҳофазаси ойлиги” доирасида дахлдор ташкилотлар билан ҳамкорликда қирғоқларни мустаҳкамлаш ва ўзанларни тозалаш тадбирлари олиб борилмоқда.

Ушбу жараёнда сел оқимлари ва сув тошқинларини хавфсиз ўтказиб юбориш мақсадида дарёлар, каналлар ва ички ариқлар ўзанларини тозалаш ишлари амалга оширилаётир. Ўрганишлар давомида маъсулларга керакли таклиф ва тавсиялар берилмоқда.

Шунингдек, Ғаллаорол ва Арнасой туманлари бўлимлари ходимлари билан биргаликда ойлик доирасида корхона, ташкилот ва муассасаларда ишчи ва хизматчилар билан зилзила ва бошқа турдаги фавқулодда вазиятлар содир бўлганда аҳолини тўғри ҳаракат қилишга ўргатишга доир семинарлар ва профилактик тадбирлар белгиланган жадвал асосида ташкил этилмоқда.

Бундан ташқари, ойлик доирасида Мирзачўл, Бахмал, Дўстлик ва Пахтакор туманларида фавқулодда вазиятлар бўлимлари ходимлари томонидан бозорлар, савдо мажмуалари ва овқатланиш жойларида профилактик тадбирлар амалга оширилди.

***

Бахмалда туман ҳокими Азиз Эргашев 14 дан 30 ёшгача бўлган ёшлар иштирокида ташкил этилган учрашувда ёшлар томонидан ишга жойлашиш, стартапларни қўллаб-қувватлаш, спорт инфратузилмасини ривожлантириш, ижтимоий лойиҳаларга кўмак бериш, фан ва таълим ҳамда ижодий лойиҳалар каби масалалар илгари сурилди.

Билдирилган таклиф ва муаммоларнинг ижобий ечими юзасидан масъулларга аниқ вазифалар юкланиб, қисқа фурсатларда ижросини таъминлаш мақсадида чора-тадбирлар белгиланиб олинди. 

Ана шу масалаларнинг ижроси туман ҳокимининг қатъий назоратида бўлишлиги таъкидланди. 

***

Зарбдор туман прокуратураси ва Жиноят ишлари бўйича туман суди ҳамкорлигида Президентимизнинг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори ижроси юзасидан пробация хизматида назоратда турган маҳкумлар билан учрашув ўтказилди. 

Тадбирда 50 нафар жазо ўтаётган маҳкум иштирок этиб, уларга назорат қоидаларини бузмаслик ва қайта жиноят содир этмаслик юзасидан тушунтириш ва кўрсатмалар берилди. Шу кунги бўлиб ўтган сайёр суд мажлисида ўрнатилган тартиб-қоида талабларини бажарган ва меҳнатга ҳалол муносабатда бўлган, йўл қўйган хатосини тушуниб, ундан пушаймон бўлган 5 нафар маҳкум жазони ўташдан муддатидан аввал озод этилди. 
Бундан ташқари, касб-ҳунар ва тадбиркорликка ўқитилган 7 нафар пробация назоратидаги шахсга сертификатлар топширилди.

***

Ғаллаорол туман адлия бўлими, Юридик марказ ва ДХМ ходимлари томонидан маҳалла фуқаролар йиғинлари ва ўша ҳудудлардаги умумтаълим мактаблари ўқитувчи ва ўқувчилари иштирокида “Менинг маҳалламда жиноят бўлмайди” дастури доирасида ҳуқуқий тарғибот тадбирлари ўтказилмоқда.

Ушбу тадбирлар доирасида “маҳалла еттилиги” ва мактаблар меҳнат жамоаларига давлатимиз раҳбарининг жорий йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарорининг мазмун-моҳияти, аҳамияти ҳақида атрофлича тушунтиришлар берилди.

Жумладан, Булоқбоши маҳалласи ва шу ҳудуддаги 77-сонли умумтаълим мактаб жамоаси биринчи чорак учун ҳуқуқбузарликларнинг барвақт профилактикасини таъминлаш бўйича ишлаб чиқилган “Йўл харитаси”да ҳар бир масъул томонидан амалга оширилиши лозим бўлган тадбирлар ҳамда адлия вазирининг “Хотин-қизларга ҳуқуқий кўмак” ҳуқуқий акциясини ўтказиш тўғрисида”ги буйруғи ижросини таъминлаш мақсадида хотин-қизларга яратилаётган имкониятлар бўйича ҳуқуқий тушунтириш берилди.

***

Мирзачўл туманидаги кўп қаватли уйларда яшовчи камбағал оилалар рўйхатига киритилган фуқаролар шароитини яхшилаш ва қишлоқ хўжалиги фаолиятига киришиш мақсадида 70 сотих ерга иссиқхона қуриб берилди. Бандлик вазирлиги ҳамда “Агробанк” АТБ масъуллари томонидан 70 сотих ерга иссиқхона қурилиши ишлари амалга оширилиши аввал ўрганилди.

Вақтинча банд бўлмаган аҳолининг иссиқхонадан йил давомида фойдаланиш имкониятлари яратилди. Ушбу лойиҳа барқарор даромад манбаси бўлиши кутилмоқда. Иссиқхона фаолияти билан боғлиқ ишлар нафақат қишлоқ хўжалиги фаолиятини ривожлантириш, балки оила учун янги иш ўринлари ва даромад манбасини ҳам яратиш имкониятини беради.

[gallery-22618]

А.Қаюмов, ЎзА мухбири