Мисрнинг “Ал-Муватин” нашри бир гуруҳ мисрлик ишбилармонлар 23-24 апрель кунлари Зомин туманида ўтказилган “Жиззах-2025” халқаро бизнес форумида иштирок этганини ёритди.
Мақолага ЎзА фото мухбири Жамшид Ёрбеков олган суратлар илова қилинган.
Ўзбекистон Республикаси Ташқи ишлар, Инвестициялар, саноат ва савдо вазирликлари, Хорижий инвестицияларни жалб этиш агентлиги ҳамда вилоят ҳокимлиги ҳамкорлигида ташкил қилинган анжуманда 30 дан зиёд давлатдан 300 нафарга яқин хорижий, 100 нафар маҳаллий сармоядор, мамлакатимиздаги дипломатик ваколатхоналар вакиллари иштирок этган.
Икки кун давом этган тадбир доирасида вилоятдаги йирик лойиҳалар тақдимоти, B2B ва B2G форматларида учрашувлар ўтказилди.
Муаллиф “Asas Altamir Contracting”, “General Metals”, “Edulixa360”, “Power tech for Material Handling”, “Hamed holding”, “Monglish International Academy”, “Bell Energy”, “In2Metals” компаниялари вакиллари билан ҳамкорликда сув тармоғи, таълим, туризм, геология, пудратчилик соҳаларида лойиҳалар амалга ошириш режалаштирилганига эътибор қаратган.
Қурилиш материаллари ишлаб чиқариш, Ўзбекистонга замонавий саноат технологияларини жалб этиш, Жиззах маҳсулотларини халқаро бозорларга олиб чиқиш бўйича шартномалар тузилгани таъкидланган.
Форум доирасида хорижий иштирокчиларга Жиззахнинг инвестициявий, савдо-иқтисодий ва туризм салоҳиятига бағишланган тақдимотлар намойиш қилинган.
Муҳаррама Пирматова, ЎзА