Ўзбекистон Республикаси Президенти ҳузуридаги Давлат бошқаруви академиясида навбатдаги йирик ўқув-амалий семинар бошланди. Унда юртимиздаги барча туман ва шаҳар прокурорларидан иборат 230 нафардан зиёд тингловчи иштирок этмоқда.
Жиноятчилик ва коррупцияга қарши курашиш, энергетик хавфсизликни таъминлаш бўйича ислоҳотларнинг жойларда ижросини самарали ташкил этиш мақсадида ташкил этилган мазкур ўқув-амалий семинарини Ўзбекистон Республикаси Президенти маслаҳатчиси Дониёр Қодиров очиб берди.
Бош прокурор Ниғматилла Йўлдошев кейинги йилларда мамлакатимизда прокуратура тизимини замон талабларига жавоб берадиган тузилмага айлантириш йўлида изчил ишлар амалга оширилганини қайд этди.
Энг муҳими, фуқароларнинг ҳуқуқлари ва қонуний манфаатлари ҳимоя қилинишини таъминлашга қаратилган бир қатор ташкилий ва ҳуқуқий чора-тадбирлар кўрилди.
Мазкур ўқув-семинарини ўтказишдан асосий мақсад жиноятчилик ва коррупцияга қарши курашиш, ёқилғи-энергия ресурсларидан самарали фойдаланишда янгича ёндашувга оид билим ва кўникмаларни ривожлантириш ҳамда ёқилғи-энергетика соҳасида қонунчилик ижросини таъминлаш ҳамда назоратни амалга оширишни такомиллаштиришдан иборат.
Н.Абдураимова, ЎзА