«Example rise» масъулияти чекланган жамияти ҳамда Мирзаобод туман мактабгача ва мактаб таълим бўлими ўртасида шартнома тузилган бўлиб, ушбу шартнома асосида бажарилган ишлар учун ҳақ ўз вақтида тўлаб берилмаган. Бунинг натижасида тарафлар ўртасида қарздорлик вужудга келган.

Мазкур қарздорликни ундириш мақсадида МЧЖ раҳбарининг Мирзаобод туман адлия бўлимига йўллаган ёзма мурожаати ўрганилди.

Таъкидлаш лозимки, шартномаларга асосан даъвогар томонидан жавобгарга 140 млн 197 минг 451 сўмлик маҳсулот етказиб берилган ҳамда тегишли хизматлар кўрсатилган. Бироқ жавобгар томонидан шартномавий мажбуриятлар тўлиқ бажарилмаган, натижада етказиб берилган товарлар ва кўрсатилган хизматлар учун тўловлар ўз вақтида ва тўлиқ амалга оширилмаган. Бунинг натижасида қарздорлик юзага келган.

Шунингдек, ўрганиш давомида озиқ-овқат маҳсулотларини етказишни аутсорсинг усулида ташкил этиш бўйича шартномалар юзасидан тендер ўтказилмаганлиги аниқланди.

Бу ҳолатдан кўринадики, шартномалар Ўзбекистон Республикаси “Давлат харидлари тўғрисида”ги қонун талабларига зид равишда тузилган. Яъни шартномаларни расмийлаштиришда давлат харидлари бўйича қонун ҳужжатларига амал қилинмаган. Шартномаларни электрон дўкон орқали, аукцион ёки тендерда энг яхши таклифлар асосида амалга ошириш талаблари инобатга олинмаган.

Қонунга мувофиқ, ФКнинг 116-моддасига кўра, шартномалар ўз-ўзидан ҳақиқий бўлмаган битим ҳисобланади. Битим ҳақиқий бўлмаган ҳолда тарафлар ўртасидаги барча олинган нарсалар қайтарилиши, агар бу мумкин бўлмаса, қиймати пулда тўланиши керак.

Шунингдек, Мирзаобод туман адлия бўлими томонидан Гулистон туманлараро иқтисодий судига даъво аризаси киритилди. Натижада суднинг ҳал қилув қарори билан жавобгар ташкилотдан 140 197 451 сўм пул маблағи ундирилиши белгиланди.

Ғулом Примов, ЎзА мухбири