Сурхондарё вилоятининг Қизириқ туманидаги Боғбонлар юрти маҳалласида ташкил этилаётган Ўзбекистон – Грузия зайтун боғига яхши ниятлар билан дастлабки кўчатлар қадалди.

 

Академик М.Мирзаев номидаги боғдорчилик, узумчилик ва виночилик илмий-тадқиқот институти Бандихон илмий станцияси Халқаро зайтун кенгаши ҳамда Грузиянинг “Svanidze Olive Oil” компанияси ҳамкорлигида барпо этилаётган ноёб боғ ўн гектар майдонни эгаллайди. Бу ерга Грузиядан келтирилган 4 минг 200 дона зайтун кўчати тажриба сифатида экилади. 

Шу муносабат билан воҳага сафар қилган Грузиянинг “Svanidze Olive Oil” компанияси раҳбари, Халқаро зайтун кенгаши фахрий президенти Георгий Сванидзе бошчилигидаги делегация дастлаб Сурхондарё вилоят ҳокими Улуғбек Қосимов билан учрашди.

Мамлакатимизнинг Грузия давлати билан ҳамкорлик алоқалари кейинги йилларда янги босқичга кўтарилмоқда. Президентимиз Шавкат Мирзиёев жорий йил 5 март куни юртимизга расмий ташриф билан келган Грузия Бош вазири Ираклий Кобахидзе бошчилигидаги делегацияни қабул қилиб, ўзаро манфаатли ҳамкорликни янада ривожлантириш масалаларига алоҳида эътибор қаратган ва давлатларимиз ҳудудларини иқтисодий ҳамкорликка фаол жалб этиш юзасидан ўзаро мувофиқлашган чоралар кўриш муҳимлигини таъкидлаган эди.

Мўътадил об-ҳаво шароитига эга жанубдаги воҳада ташкил этилаётган Ўзбекистон – Грузия зайтун боғи ҳам мамлакатларимиз ўртасида йўлга қўйилаётган кўп қиррали ишончли ҳамкорлик муносабатлари самарасидир. 

Самимий мулоқот чоғида шу ҳақда атрофлича фикр алмашилиб, меҳмонларга вилоятнинг қишлоқ хўжалиги соҳасидаги имкониятлари, инвестицион салоҳияти тўғрисида маълумот берилди. Воҳада зайтун етиштириш ва қайта ишлаш лойиҳасини амалга ошириш муҳокама этилиб, тегишли келишувга эришилди.

Шу куни меҳмонлар янги зайтунзор барпо этилаётган Академик М.Мирзаев номидаги боғдорчилик, узумчилик ва виночилик илмий-тадқиқот институти Бандихон илмий станцияси танлаган ҳудуд билан танишди. Тупроқнинг унумдорлиги ва сув таъминоти билан қизиқди. Янги мевали боғга кўчат экишни бошлаб берди.

– Ерга кўчат қадашда улуғ ниятлар қилишнинг ҳам ўзига хос фазилати бор, – дейди Грузиянинг “Svanidze Olive Oil” компанияси раҳбари, Халқаро зайтун кенгаши фахрий президенти Георгий Сванидзе. – Қадимдан зайтун саломатлик, ҳаёт ва унумдорлик дарахти сифатида таърифланади. Келинг, бу ерда биргаликда барпо этаётган зайтунзоримиз ҳам минг йиллар ҳосил берсин. Меваси мўл, баракали бўлсин. Кўчат тўлиқ экиб бўлингач, тажрибали зироатшуносларимиз келиб, уни парваришлаш  агротехнологиясини ўргатади. Ёшлардан етук мутахассислар тайёрлашга кўмаклашамиз. Бугун юртингизда илк йирик зайтунзорга асос солингани ва Ўзбекистоннинг Халқаро зайтун кенгаши аъзоси бўлгани билан қутлайман. 

Академик М.Мирзаев номидаги боғдорчилик, узумчилик ва виночилик илмий-тадқиқот институти Бандихон илмий станцияси далада зайтун кўчатининг етти навини экиб, синовдан ўтказади. Совуққа чидамли бу навларнинг вилоят иқлимига мослашгани кенг майдонларда экиб, парваришлашга тавсия этилади. Зайтунзор ташкил этишнинг илк босқичида минг гектар боғ барпо этиш режалаштирилган. 

Мутахассисларнинг айтишича, зайтун мевасидан инсон саломатлиги учун фойдали ёғ олинади. У холестерин даражасини пасайтирилади. Атеросклероз, юрак-қон томир касалликлари, диабет, альцгеймер ва бошқа касалликларнинг олдини олади. Бу ёғ яллиғланишга қарши таъсирга эга бўлиб, ангина, милк касалликлари, тромбофлебит, ошқозон яраси ва бошқа инфекциялардан ҳимоя қилади. Шу боис шифокорлар ошқозон яраси учун буюрадиган биринчи даволовчи парҳез жадвалида зайтун ёғи асосий рол ўйнайди. Зайтун ёғи таркибидаги олейк ва линолеик кислоталар, А, D, E, К витаминлари унинг шифобахш хусусиятларини таъминлайди. 

– Кўчатлар 4 йилда ҳосилга киради, – дейди Академик М.Мирзаев номидаги боғдорчилик, узумчилик ва виночилик илмий-тадқиқот институти Бандихон илмий станцияси директори Сирожиддин Абдушукуров. – Бир гектар майдондаги дарахтдан 15 тоннагача мева олиш мумкин. Унинг кўчатлари инвитро усули ва қаламчасидан кўпайтирилмоқда.

Сафар доирасида меҳмонлар Қумқўрғон туманидаги “Agro Processing Group” масъулияти чекланган жамиятининг қишлоқ хўжалиги маҳсулотларини қайта ишлаш ва қуритиш, Термиз туманидаги “Gold Dried Fruits Export” масъулияти чекланган жамиятининг мева-сабзавот етиштириш ва қайта ишлаш кластери фаолияти, Ўзбекистон-Афғонистон чегарасидаги замонавий “Термиз” халқаро савдо маркази эркин савдо зонаси билан танишди.

Холмўмин Маматрайимов, 

ЎзА мухбири