IT Park Uzbekistan Словакия инвестициялар ва савдони ривожлантириш агентлиги (SARIO) билан ҳамкорликда "IT Park Uzbekistan'даги бизнес имкониятлари" мавзусида вебинар ўтказди, деб хабар берди Ўзбекистон Рақамли технологиялар вазирлиги матбуот хизмати.

Қайд этилишича, "Zoom" платформасида ташкил этилган онлайн вебинар IT Park Uzbekistan'нинг хизматлар экспортини ривожлантириш бўйича директори Махлиё Муксинованинг қутлов сўзи билан бошланди. У ўз нутқида халқаро ҳамкорликнинг аҳамиятини таъкидлаб, Ўзбекистондаги рақамли трансформацияни қўллаб-қувватлаш бўйича IT Park'нинг стратегик мақсадларини тақдим этди. Сўнгра IT Park вакиллари IT-компанияларга кўрсатилаётган кенг қамровли кўмак тўғрисида мазмунли тақдимот ўтказди.

Тадбирнинг асосий қисми "Montfort Eurasia" директори ўринбосари Алёна Георгобианининг тақдимоти бўлди. Тақдимот доирасида у ўз компаниясининг муваффақиятли тажрибаси билан ўртоқлашди ва IT Park Uzbekistan резиденти сифатида эришган ҳақиқий афзалликлари ҳақида сўз юритди. Шу билан бирга, иштирокчиларга IT Park тақдим этаётган имтиёзлар ҳақида қимматли маълумотлар берди.  

Вебинар якунида IT Park вакиллари сўзга чиқиб, Словакия ва Ўзбекистон компаниялари ўртасидаги ҳамкорликнинг улкан салоҳиятини таъкидладилар, шунингдек, IT Park'нинг мустаҳкам шериклик алоқаларини ўрнатишга бўлган интилишини қайд этдилар.

Н.Раҳмонова тайёрлади, ЎзА