Ватан учун, миллат учун, халқ учун!

Айни кунларда Ватанимиз мустақиллигининг 34 йиллиги юртимиз бўйлаб кенг нишонланмоқда. Босиб ўтган мустақил тараққиёт йўлимизни сарҳисоб қилсак, ҳар бир соҳа ва йўналишда туб ислоҳотлар амалга оширилгани ва мисли кўрилмаган натижалар қўлга киритилганига амин бўламиз. 

Биргина мамлакат иқтисодиётини мустаҳкамлаш, иқтисодий ўсишни, ялпи ички маҳсулот ҳажмини оширишни барқарор таъминлашга устувор аҳамият қаратилди. Бу борада эркин ва рақобатбардош тадбиркорлик муҳитини таъминлаш, тадбиркорлар учун ҳар томонлама қулай шароит яратишга давлат сиёсатининг устувор йўналиши сифатида қаралди. Тадбиркорларнинг ташаббусларини қўллаб-қувватлаш ва тўсиқларни камайтиришга жиддий эътибор қаратилди.

Ҳар йили 20 август куни Ўзбекистон Республикаси Президентининг тадбиркорлар билан очиқ мулоқоти ташкил этилиб, уларнинг ташаббуслари, муаммолари ва таклифлари тингланмоқда, уларга янада кенг қулайликлар, имкониятлар тақдим этилмоқда. Зеро, мамлакатнинг иқтисодий салоҳияти ва барқарор ривожланиши айни тадбиркорлик фаолияти билан чамбарчас боғлиқ. 

Бу борада Олий Мажлис Қонунчилик палатаси депутати, ЎзЛиДеП фракцияси аъзоси Отабек Мусулмонов ўз фикр-мулоҳазалари ва муносабатини билдирди.

Депутат қайд этганидек, мустақиллик йилларида тадбиркорлик соҳасида бозор иқтисодиёти моделига ўтилгани ўз самарасини бермоқда. Биргина 2024 йилда мамлакатимиз иқтисодиётига қарийб 35 миллиард долларлик инвестиция кириб келди. Бу катта натижа. Шунингдек, 27 миллиард долларлик экспорт ҳажмига эришилди. Ялпи ички маҳсулот ҳажми эса 115 миллиард долларга етиб, тарихий натижа қайд этилди. Тадбиркорлар сони, даромадлар ҳажми йилдан-йилга ортиб бормоқда. Мамлакат ўз олдига қўйган стратегик аҳамиятга эга ақлли мақсадлар натижасида ана шундай юксак самараларга эришилмоқда. 

Батафсил: қуйидаги видеоҳаволада. 

<iframe width="650" height="420" src="https://www.youtube.com/embed/yt8-wX3EYjg" title="Islohotlar samarasi: Erkin tadbirkorlik muhiti — iqtisodiy barqarorlikka zamin" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳтарама Комилова, Дониёр Якубов, Анвар Аҳмедов (видео), ЎзА