Хитойнинг Noetix Robotics стартапи инсон шаклидаги янги робот — “Буми”ни жамоатчиликка намойиш этди. Бу ҳақда Robotics and Automation News нашри хабар берди.

Компаниянинг маълум қилишича, “Буми”нинг нархи атиги 1370 доллар бўлиб, бу деярли iPhone 17 нархига тенг. Шу билан Noetix ўз маҳсулотини “нарх тўсиғини енгиб ўтган дунёдаги биринчи юқори самарали гуманоид робот” деб атади. 

“Буми” — икки оёқли, 94 см бўйли ва 12 кг оғирликдаги робот бўлиб, композит материаллардан ишлаб чиқилган. Енгил тузилиш унга барқарор юриш, буйруқларга тез жавоб бериш, ҳатто рақсга тушиш имконини беради. Унинг ҳаракатлари Noetix компаниясининг махсус ишлаб чиқилган баланс ва ҳаракатни бошқариш тизими орқали мувозанатли тарзда назорат қилинади.

Янги робот фақатгина уй ёрдамчиси сифатида эмас, балки таълимий платформа сифатида ҳам ишлаб чиқилган. Унда очиқ дастурлаш интерфейси (API) мавжуд бўлиб, бу талабаларга, дастурчиларга ва робототехника ишқибозларига “Буми” учун ўз скриптлари ёки таълим дастурларини ёзиш имконини беради. Шу йўл билан Noetix стартапи робототехника соҳасида кенг жамоатчиликни жалб этишни мақсад қилган. 

Компания “Буми” моделининг чиқарилишини одамсимон роботларнинг кундалик ҳаётга интеграциялашувидаги муҳим қадам сифатида баҳолади. Роботнинг олдиндан буюртмалари Хитойдаги икки йирик савдо марафони — Доубле 11 (11 ноябрь) ва Доубле 12 (12 декабрь) кунлари очилиши режалаштирилган. 

<iframe width="640" height="420" src="https://www.youtube.com/embed/rNbxIdHSOz4" title="iPhone narxidagi gumanoid robot taqdim etildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Мадинабону Насриева, Улуғбек Тўхтаев, ЎзА