Интеллектуал ресурслар мамлакат ривожини таъминлайдиган муҳим омиллардан.
Шу боис юртимизда интеллектуал мулкни муҳофаза қилиш тизимини соддалаштириш, жумладан талабнома берувчиларни интеллектуал мулк объектларини давлат рўйхатидан ўтказиш жараёнида юзага келадиган ортиқча бюрократик тўсиқлардан холи этиш мақсадида бир қатор ишлар амалга оширилмоқда. Бу борадаги ишлар натижаси ўлароқ, 2024 йилда ихтиролар сони 2020 йилга нисбатан 10 фоизга, фойдали модель 160 фоизга ошган. Рўйхатдан ўтган интеллектуал мулк объектлари 2024 йил ҳолатига 21 минг 985 тани ташкил этиб, 46 фоизга ошган.
Ушбу рақамлар Олий Мажлис Қонунчилик палатасининг бугунги мажлисида адлия вазири ўринбосари Музраф Икромов томонидан айтиб ўтилди. Мажлисда интеллектуал мулк объектларини рўйхатдан ўтказиш тартибларини соддалаштиришга қаратилган қонун лойиҳаси биринчи ўқишда кўриб чиқилди.
Вазир ўринбосари қайд этганидек, мазкур лойиҳа интеллектуал мулк объектларини яратиш кўламини ошириш ва муаллифларни қўллаб-қувватлашга қаратилган. Қонун лойиҳаси билан саноат мулки объектларини рўйхатдан ўтказиш жараёнларида талаб қилинадиган давлат божи тўланганини тасдиқловчи ҳужжатларни тақдим этишни бекор қилиш белгиланмоқда.
Амалдаги қонунчиликка кўра, электрон ҳисоблаш машиналари учун дастурларни ва маълумотлар базаларини расмий рўйхатдан ўтказиш учун амалга ошириладиган текширув муддати аниқ белгиланмаган. Қонун лойиҳасида эса электрон ҳисоблаш машиналари учун дастурларни ва маълумотлар базаларини расмий рўйхатдан ўтказиш учун тақдим этилган талабнома ва унга илова қилинган ҳужжатларнинг белгиланган талабларга мувофиқлигини текшириш муддатини 10 кун этиб белгилаш назарда тутиляпти.
Таъкидланганидек, қонун лойиҳасининг қабул қилиниши қонунчиликдаги интеллектуал мулк объектларини давлат рўйхатидан ўтказиш тартиб-таомилларининг соддалаштирилишига, ортиқча талабларнинг бартараф этилишига ҳамда интеллектуал мулк эгаларини қўллаб-қувватлашга хизмат қилади.
Муҳтарама Комилова, ЎзА