Рамазон ҳайити арафасида Президентимиз томонидан имзоланган “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги Фармонига кўра, йўлдан адашган 14 нафар бухороликларга ҳам яна бир имконият тақдим қилинди.

Бухоро шаҳрида яшовчи Дониёр ҳам бундан бир йил муқаддам ўғрилик жиноятини содир қилиб, 5 йил умрини панжара ортига ўтказишга маҳкум қилинганди. Аммо у муддатидан 4 йил олдин ўз оиласи бағрига қайтди.

– Қилмишимдан жуда афсусдаман. Энди бундай ножўя ишлар билан шуғулланмайман. Президентимизнинг шарофати билан бугун озодликка чиқяпман. Оила даврасида озодликни қадрлайман. Чунки озодликда юриш, нафас олиш ҳеч нарсага етмас экан, – дейди  Дониёр Раҳматов.

Шароф Очилов бу йил 65 ёшни қаршилайди. Агарда у тайинланган жазони узил-кечил ўтаганда 70 ёшида яқинлари бағрига қайтган бўларди. Бағрикенглик, олижаноблик ва инсонпарварлик сиёсатининг амалдаги ифодаси сифатида унинг қилмишлари кечирилди. Ўтган бир йил у ўзи айтганидек, катта мактаб вазифасини ўтади.

Бугун Дониёр Раҳматов, Шароф Очилов каби афв этилган бухороликлар оиласида ҳам қўшалоқ байрам. Кимнингдир отаси, кимнингдир акаси, кимнингдир турмуш ўртоғи яна ўз бағрига қайтди. Улар юртимиздаги инсон қадри учун амалга оширилаётган ушбу кунларга шукрона айтиб, юрт равнақи учун муносиб улуш қўшишни ўзларининг асосий мақсадлари деб билишмоқда.

Зариф Комилов, ЎзА мухбири.