Нурафшон шаҳрида Тошкент вилояти божхона бошқармаси ташаббуси билан очиқ мулоқот ўтказилди. Унда вилоятда фаолият юритаётган ташқи иқтисодий фаолият қатнашчилари ҳамда кенг жамоатчилик вакиллари қатнашди.
Мақсад – тадбиркорларга божхона қонунчилигига киритилган сўнгги ўзгартириш ва янгиликларни тушунтириш, уларнинг амалиётда қўлланилишини осонлаштиришга кўмаклашишдан иборат. Мулоқотда мутахассислар томонидан Президентимизнинг 2025 йил 18 апрелдаги “Ишлаб чиқариш, экспорт ва тадбиркорлик фаолиятини рағбатлантириш, савдо ва саноат сиёсати самарадорлигини ошириш чора-тадбирлари тўғрисида”ги фармони ҳамда Вазирлар Маҳкамасининг 2025 йил 19 апрелдаги тегишли қарорига мувофиқ белгиланган божсиз олиб кириш тартибларига оид маълумотлар тақдим этилди.
Қайд этилганидек, 1 июль санасидан бошлаб ветеринария ва фитосанитария ҳужжатларини муҳрлаш ва қўлда рўйхатга олиш бекор қилинади ва товарларга нисбатан божхона имтиёзлари бўйича дастлабки қарорлар бериш ЖСТ талаблари асосида жорий этилади. Шунингдек, 2025 йил 1 декабрдан, “Толлинг операциялари” модули орқали қайта ишлаш режимларида декларацияларни соддалаштирилган тартибда расмийлаштириш йўлга қўйилади.
Семинарда, “божхона ҳудудида қайта ишлаш” божхона режимининг имкониятлари ҳам батафсил тушунтирилди. Мазкур режим экспортга йўналтирилган ишлаб чиқариш жараёнларини рағбатлантиришга қаратилган бўлиб, хорижий бозорлар билан алоқаларни кенгайтириш учун кенг йўл очади.
Маълумотларга кўра, жорий йилнинг 3 ойида 445,6 миллион доллардан зиёд бўлган товарлар хорижий мамлакатлар бозорларига юборилган. Хусусан, экспорт қилинган асосий ҳамкорлар орасида Туркия, Қозоғистон, Хитой, Россия, Тожикистон, Афғонистон, Бельгия ва Польша каби давлатлари бор. Экспорт қилинганлар асосан металлар ва улардан тайёрланган буюмлар, озиқ-овқат, транспорт ва унинг эҳтиёт қисимлари, кимё-саноат ва тўқимачилик маҳсулотлари ҳисобига тўғри келмоқда. Бу йўналишда келгусида ҳам тизимли равишда қулайликлар ташкил этилиши айтилди.
Тадбир иштирокчилари ўзларини қизиқтирган саволларга жавоб олди ва божхона тизимини янада такомиллаштириш борасидаги ўнлаб таклифларни билдирди.
А.Мусаев,ЎзА