Ўзбекистонлик аёлларнинг тадбиркорлик соҳасидаги фаолиятини рағбатлантириш, иқтидорини юзага чиқариш, раҳбарлик муваффақиятларини оммалаштириш, мустақил бизнес очиш борасидаги ижтимоий ташаббусларини қўллаб-қувватлашга кўмак берувчи, бу йил ўнинчи бор ўтказилаётган “Ишбилармон аёл” кўрик-танловига республикамиз бўйлаб старт берилди.

O‘zLiDePнинг энг йирик лойиҳаларидан бўлган ушбу ўзига хос беллашувнинг илк саралаш босқичлари шу кунларда маҳалла-овулларда бошланди. Жумладан, Тахиатош тумани “Дўстлик” маҳалла фуқаролар йиғинида ушбу танловнинг маҳалла босқичи бўлиб ўтди.

– Танловни ўтказишдан асосий мақсад, мамлакатимизда амалга оширилаётган ижтимоий-иқтисодий ислоҳотлар, сиёсий жараёнларнинг мазмун-моҳиятини аёллар ўртасида кенгроқ тарғиб қилиш, – дейди O‘zLiDeP Тахиатош тумани кенгаши аппарат раҳбари Қуанишбай Аймуратов. – Шунинг баробарида кичик бизнес ва хусусий тадбиркорликни ривожлантиришга муносиб ҳисса қўшаётган хотин-қизларимизни рағбатлантириш ҳам кўз тутилган. Тадбир доирасида республиканинг энг чекка қишлоқларигача бўлган ҳудудлардаги хотин-қизлар бандлигини таъминлаш, улар ўртасида оилавий тадбиркорликни ривожлантиришни янги босқичга олиб чиқишга алоҳида аҳамият қаратилмоқда.       

Саралашда ушбу маҳаллада 2011 йилдан буён тикувчилик билан шуғулланиб келаётган якка тадбиркор Гулсинай Атамуратованинг фаолияти ҳайъат аъзолари томонидан юқори баҳоланди. У ҳозирда “Аёллар дафтари”даги 5 нафар маҳалладошини иш билан таъминлаган. 

Ғолибага партиянинг диплом ҳамда эсдалик совғалари топширилди.

Довуд Абибуллаев, ЎзА мухбири.