Қатар давлатининг “QNA” ахборот агентлиги “Кўрфаз араб давлатлари ҳамкорлик кенгаши Бош котиби Жасим Муҳаммад Ал-Будаивий Тожикистон, Қирғизистон ва Ўзбекистон ўртасидаги чегараларни белгилаш бўйича Хўжанд декларациясини олқишлайди” сарлавҳали мақола эълон қилди.

– Ал-Будаивий ўз баёнотида мазкур тарихий уч томонлама учрашув минтақада фаровонлик ва тараққиётни кучайтирувчи ҳамда уч мамлакат халқлари манфаатига хизмат қилувчи стратегик муносабатларни ривожлантириш учун муҳим асос бўлди, - дейилади мақолада.

Шунингдек, нашрда Хўжанд шаҳрида бўлиб ўтган олий даражадаги тадбирлар дастурига мувофиқ Ўзбекистон Республикаси Президенти Шавкат Мирзиёев, Тожикистон Республикаси Президенти Эмомали Раҳмон ва Қирғиз Республикаси Президенти Садир Жапаров уч мамлакат давлат чегаралари туташган ҳудудда Дўстлик стеласини тантанали равишда очганлиги урғуланган.

Ушбу ёдгорлик қардош мамлакатлар ўртасидаги дўстлик, яхши қўшничилик, ишонч ва стратегик шериклик муносабатлари мустаҳкамланиб бораётганининг рамзи бўлиши эътироф этилган.

М.Пирматова, ЎзА